Almatyda brıtandyq mýzykant Nık Hadsonnyń qatysýymen qaıyrymdylyq keshi ótedi. Ol Massive Attack, Mogwai jáne Can tobynyń Damo Sýdzýkımen birge jumys istegenimen tanymal. İs-shara 12 qyrkúıekte DUMP bar-kofehanasynda ótedi. Onda ártis Tbılısıde jazylǵan sońǵy soldyq álbomdaryndaǵy ánderin oryndaıdy, sondaı-aq aldaǵy Trees Reign Down, Fire On plasınkasyndaǵy materıaldy alǵash ret usynady. Onyń mýzykasyn folk-nýar, avtorlyq jáne eksperımentaldy mýzykanyń qospasy retinde sıpattaıdy, dep habarlaıdy infohub.kz.
Mýzykalyq bólimnen bólek, qonaqtardy zamanaýı ónerdiń qaıyrymdylyq aýksıony kútedi. Oǵan óz týyndylaryn Hadsonnyń ózi, sondaı-aq Ilás Actk Sarbekov, Repas komandasynyń sýretshileri, Leonıd Han, Roman Zaharov, Asqat Ahmedárov, Arystanbek Shalbaev, Merýert Qunaqova, Arýjan Jumabek jáne Aıgerim Ospan usyndy.
Jınalǵan barlyq qarajat ýnıversıtette 20 jyldan astam fızıkalyq geografıadan sabaq bergen Aıdar Jumadilovtiń otbasyna beriledi. Osy qysta oǵan ókpeniń IV satysyndaǵy qaterli isigi dıagnozy qoıyldy. Qazir oǵan uzaq merzimdi isikke qarsy terapıa qajet, al qymbat dári-dármekterdiń bir bóligin memleket bermeıdi.
«Emdeý quny jylyna shamamen $75 myńdy (34 mln teńge) quraıdy — bul somany otbasy óz kúshimen kótere almaıdy. Aıdardyń uly — bizdiń dosymyz ári DUMP komandasynyń múshesi. Sondyqtan biz eń jaqsy isteı alatyn nárseni jasaýdy jón kórdik: aınalamyzǵa adamdardy, mýzykany jáne ónerdi jınap, bir keshti naqty kómekke aınaldyrý», — dep habarlady Dump Coffee&Bar.
Kesh saǵat 19:00-de Gogol kóshesi, 40 mekenjaıynda, ARTıSHOK teatrynyń birinshi qabatynda bastalady. Kirý tegin, qonaqtar qaıyrymdylyq jasaı alady. Sondaı-aq alańda kesh boıy bar jumys isteıdi.