Qazaqstanda jeke notarıýstar qyzmetin retteýde aýqymdy ózgerister kúshine enedi. Reforma zańnamadaǵy olqylyqtardy joıýǵa jáne notarıat salasyn tolyq sıfrlyq formatqa kóshirýge baǵyttalǵan, dep habarlaıdy infohub.kz saıty.
Jańa erejelerge sáıkes, Ádilet mınıstrligi jáne onyń aýmaqtyq bólimsheleri jeke notarıýstar men notarıattyq palatalarǵa josparly jáne jospardan tys tekserýler júrgizýge resmı ókilettik alady. Negizgi jańashyldyq — elektrondyq sıfrlyq qoltańbany (ESQ) kómekshige nemese basqa úshinshi tulǵalarǵa bergeni úshin lısenzıadan dereý aıyrý. Azamattardyń derbes derekteriniń jarıa bolýy, sondaı-aq mámileler týraly aqparatty biryńǵaı derekqorǵa engizýde júıeli kidirister úshin de osyndaı sanksıalar qarastyrylǵan.
Sonymen qatar, elimizde «Notarıattyq sıfrlyq arhıv» jáne atqarýshylyq jazbalardy avtomatty túrde bólý júıesi sıaqty eki mańyzdy sıfrlyq joba iske qosylady. Ekinshi mehanızm naqty is boıynsha notarıýsty tańdaý kezdeısoq túrde júzege asyrylatynyn kózdeıdi, bul sóz baılasý nemese ádiletsizdik múmkindigin joıady.
Barlyq elektrondyq qujattar endi sıfrlyq júıede merzimsiz saqtalady. Notarıýstyń lısenzıasy toqtatylǵan nemese kúshi joıylǵan jaǵdaıda, onyń muraǵaty dereý alynyp, jumystyń úzdiksizdigin qamtamasyz etý úshin basqa mamanǵa beriledi.
Budan basqa, notarıattyq palatalardyń basshylaryna shekteýler engizildi: endi tártiptik komısıalardy tórt jyl merzimge bir ret qana basqarýǵa ruqsat etiledi.
Aıta ketý kerek, buǵan deıin burynǵy depýtat Baqytjan Bazarbek notarıat qaýymdastyǵy ókilderin buzýshylardy «aqtaýǵa» tyrysty dep aıyptaǵan bolatyn. Óz kezeginde, respýblıkalyq notarıattyq palatanyń tóraǵasy Oleg Polýmordvınov Bas prokýratýranyń usynýynan keıin keıbir notarıýstar lısenzıasynan aıyrylǵanyn moıyndady.