Nuraı Serikbaıdyń advokaty Aıanhan Omarov mańyzdy málimdeme jasady, dep habarlaıdy infohub.kz.
Onyń sózinshe, áleýmettik jelide marqum Nuraı Serikbaıdy qorlaıtyndar bar. Sondaı adamdardyń biri qyzdyń atyna orynsyz sózder jazǵan.
«Instagram-daǵy Nuraı Serikbaıdyń isine qatysty qorlaıtyn pikir qaldyrǵan akkaýnt ıesin anyqtaý jáne zań aıasynda jaýapqa tartý týraly QR İİM Kıberqylmysqa qarsy is-qımyl departamentine resmı aryz joldandy. Áleýmettik jelidegi anonımdilik jaýapkershilikten bosatpaıdy», - dep jazdy advokat.
Buǵan deıin Nuraı Serikbaıdyń týystary tergeý jumysyna kóńil tolmaıtynyn bildirgen. İs materıaldarymen tanysqannan keıin olar men advokattary eleýli zańbuzýshylyqtar anyqtalǵanyn aıtyp, materıaldardy qosymsha tergeýge qaıtarýdy suraǵan.
Marqumnyń jaqyndary is sotqa joldanǵan kezde aıyptyń keıbir baptary alynyp tastalýy múmkin dep alańdap otyr.
Qazirgi ýaqytta 28 jastaǵy kúdiktige asa qatygezdikpen adam óltirý, stalkıng jáne nekege turýǵa májbúrleý baptary boıynsha aıyp taǵylǵan.
Eske salaıyq, 21 jastaǵy Nuraı Serikbaı 11 qańtar kúni keshke Shymkentte qaza tapqan. Tergeý nusqasyna qaraǵanda, kúdikti qyzdy dúkenniń janynda ańdyp kútip, kúshpen ustap turǵan, oǵan birneshe ret pyshaq suǵyp, keıin oqıǵa ornynan boı tasalaǵan.