Qazaqstan polıseıleri esirtkiniń tranzıt arnalaryn jabýǵa baǵyttalǵan sharalar qoldanyp jatyr. Jambyl oblysynda arnaıy is-sharalar barysynda 120 kg daıyn ónim men esirtki jasaýǵa arnalǵan shıkizat tárkilendi, dep habarlaıdy infohub.kz saıty.
İshki ister mınıstrliginiń aqparattyq medıaportalynyń málimetinshe, Merki aýdanyndaǵy Qarasý aýylynyń mańynda jerasty taınıginen 20 kg marıhýanany alyp jatqan jerinen jergilikti turǵyn ustaldy. Ol buryn esirtki satqany úshin birneshe ret sottalǵan.
Shý aýdanynda bir zaýyttyń mańynda keptirilgen marıhýana salynǵan bes qap toly taınıkti qazyp ashyp jatqan úsh jergilikti turǵyn ustaldy. Tárkilengen esirtkiniń jalpy salmaǵy 72 kg boldy. Ustalǵandardyń ekeýi buryn esirtkiniń zańsyz aınalymy úshin qylmystyq jaýapkershilikke tartylǵany belgili boldy.
Sonymen qatar Túrksib stansıasynda Shý — Tátti temirjol aralyǵynda eki jergilikti turǵyn ustalyp, olardan 25 kg quramynda esirtkisi bar qarasora ósimdigi tárkilendi.
Esirtkini asa iri mólsherde saqtaýdyń barlyq faktisi boıynsha Qazaqstan Respýblıkasy Qylmystyq kodeksiniń 296-babynyń 4-bóligi boıynsha sotqa deıingi tergep-tekserý bastaldy. Ustalǵandar ýaqytsha ustaý ızolátoryna qamaldy.