Oralda bir er adam tanysyn qanǵa bóktirip, keıin ózin-ózi qorǵaý sheginde áreket etkenin aıtqan. Alaıda sot onyń dálelderine senbedi, dep habarlaıdy infohub.kz saıty.
«Kasasıalyq sottardyń ózekti jańalyqtary» Telegram-arnasynda habarlanǵandaı, Oral turǵyny óz páterinde tanysynyń basyna, keýdesine, ishine, arqasyna jáne jambasyna birneshe ret pyshaq urǵan. Nátıjesinde jábirlenýshiniń densaýlyǵyna ómirine qaýip tóndiretin aýyr zıan keltirilgen.
Birinshi satydaǵy sot er adamdy Qylmystyq kodekstiń 106-babynyń 1-bóligi boıynsha (densaýlyqqa qasaqana aýyr zıan keltirý) kináli dep tanyp, bes jylǵa bas bostandyǵynan aıyrdy. Apelásıalyq saty úkimdi ózgerissiz qaldyrdy.
Kasasıalyq shaǵymda sottalǵan adam burynǵy sot sheshimderiniń kúshin joıýdy jáne onyń áreketterin qaıta saralaýdy surap, janjal men pyshaqtap shabýyldyń bastamashysy jábirlenýshi bolǵanyn málimdegen. Onyń aıtýynsha, ol ózin-ózi qorǵaý maqsatynda pyshaqty tartyp alyp, jaýap retinde urǵan.
Kasasıalyq sot er adamnyń qajetti qorǵanys týraly dálelderin negizsiz dep tanydy. Zerttelgen dáleldemelerge sáıkes, mas kúıinde sottalǵan adam jábirlenýshige ómirlik mańyzdy organdarǵa keminde on ret pyshaq uryp, kóptegen jaraqattar men ómirge qaýipti qan ketýdi týdyrǵan.
Sonymen qatar, jábirlenýshi eshqandaı qarsylyq kórsetpegen, onyń tarapynan qorǵaýdy qajet etetin shabýyl nemese ózge de qaýipti áreketter bolmaǵan. Jaraqattardyń sıpaty men oqıǵanyń mán-jaıy shabýyldy dál tanysy jasaǵanyn kórsetken.
Jábirlenýshiniń aıǵaqtary sot saraptamalarynyń nátıjelerimen, kýágerlerdiń aıǵaqtarymen jáne oqıǵa ornyn qaraý derekterimen sáıkes keledi, onda pyshaq pen qan izderi tabylǵan.
Kasasıalyq sot QK 106-babynyń 1-bóligi boıynsha áreketterdiń saralanýynyń zańdylyǵyn, taǵaıyndalǵan jazanyń aýyrlyq dárejesine sáıkestigin jáne isti qaraý kezinde prosestik talaptardyń saqtalǵanyn rastady.