Oralda sot polısıanyń oqýshy qyzdy arnaıy oqý ornyna jiberý ótinishin qanaǵattandyrmady. Sebebi, qyzdyń sabaqqa barmaýy synyptastarynyń qysymynan bolǵany anyqtaldy, dep habarlaıdy infohub.kz.
Batys Qazaqstan oblysynyń kámeletke tolmaǵandar isteri jónindegi mamandandyrylǵan aýdanaralyq soty jergilikti polısıanyń talabyn qarady. Quqyq qorǵaý organdary qyzdy devıantty minez-qulyqty balalarǵa arnalǵan mektepke ornalastyrýdy talap etip, onyń sabaqqa júıeli túrde qatyspaǵanyn alǵa tartty.
Alaıda sot otyrysy barysynda ózge jaǵdaılar anyqtaldy. Oblystyq sottyń málimetinshe, oqýshy qyz sabaqqa býllıngke baılanysty barmaǵanyn aıtqan. Mekteptegi turaqty qysym onyń emosıonaldyq jaǵdaıyna keri áser etip, sabaqqa barýǵa erik-jigeri bolmaǵan. Bul dálelderdi prokýror da qoldady.
Sot «Quqyq buzýshylyqtardyń aldyn alý týraly» Zańdy eske salyp, oqý oryndary qaýipsiz orta qurýǵa jáne býllıngke tap bolǵan balalarǵa psıhologıalyq kómek kórsetýge mindetti ekenin atap ótti.
Sýdıa sabaqqa qatyspaýdyń naqty sebepterin anyqtamaı, balany arnaıy mektepke jiberýge negiz joq dep sheship, polısıanyń talabyn qabyldamady.
Sonymen qatar, sot polısıa departamenti men bilim basqarmasyna jekeshe qaýly shyǵaryp, býllıngtiń aldyn alý jumystarynyń jetkiliksizdigin jáne qyzdyń shaǵymdarynyń elenbegenin kórsetti.
Sheshim áli zańdy kúshine engen joq.