InfoHub Logo

Oral qalalyq máslıhatynyń depýtattary qoǵamdyq kóliktegi jol júrý aqysy men qoqys shyǵarý qyzmetiniń tarıfterin kóterý týraly qala ákimdiginiń usynysyn jaqyn arada ótetin sesıanyń kún tártibinen alyp tastady. Bul sheshimge 16 depýtattyń 13-i daýys berdi.

Bul týraly Infohub.kz aqparat agenttigi habarlaıdy.

Nelikten tarıfterdi talqylaýdan bas tartty?

Depýtattar qala ákimdigi men olardyń merdigerleriniń usynyp otyrǵan tarıfteriniń negizdiligine kúmán keltirdi. Olardyń aıtýynsha, ákimdik tarapynan berilgen aqparattar jetkiliksiz jáne kompanıalardyń shyǵyndaryn esepteý ádistemesi aıqyn emes. Máslıhat depýtaty Konstantın Sveshnıkovtiń aıtýynsha, bul másele qalanyń 372 myń turǵynynyń múddesine qatysty bolǵandyqtan, sheshim qabyldaý úshin tolyqqandy derekter qajet.

Qandaı talaptar qoıyldy?

Depýtattar jolaýshylar tasymaldaıtyn kompanıalardyń qarjylyq eseptiligin, alǵan sýbsıdıalarynyń kólemin, shyǵyndarynyń qurylymyn, sonyń ishinde janar-jaǵarmaıǵa jumsalǵan shyǵyndardy esepteý ádistemesin talap etti. Sondaı-aq, barlyq tasymaldaýshy kompanıalarmen jasalǵan kelisimsharttardyń tolyq mátinin usynýdy surady.

Ákimdiktiń jaýaby

Qala ákimdigi jol júrý tarıfterin kóterý qajettiligin tasymaldaýshylardyń shyǵyndarynyń kiristerinen asyp túsýimen jáne sýbsıdıalardyń jetkiliksizdigimen túsindirdi. Alaıda, depýtattar bul ýájderdi tolyq negizdi dep tappady.

Basqa da máseleler

Depýtat Aslanbek Amınov beznalıchnyı tólem júıesi operatory «Smart qala» JSHS komısıasynyń 9%-dan 15%-ǵa deıin bir jaqty kóterilgenine nazar aýdardy. Ol bul týraly BAQ-tan bilgenin aıtyp, kompanıa basshylyǵyn shaqyryp, barlyq esep-shottardy ashýdy usyndy.

Qalalyq máslıhat tóraǵasy Esentaı Kalıev tarıfterdi talqylaýdan alyp tastaýǵa qarsy bolǵanymen, daýys berý qorytyndysy boıynsha depýtattardyń sheshimi basymdyqqa ıe boldy.