Áleýmettik jelilerde iskerlik kostúm kıgen er adamnyń onlaın-jınalys kezinde jumys ornynda elektrondyq temeki shegip otyrǵan vıdeosy tarady. Jazbadaǵy adam Qaraǵandy oblysynyń depýtaty bolýy múmkin ekeni aıtylady, dep habarlaıdy infohub.kz saıty.
«Qaraǵandy oblysy Osakarov aýdandyq máslıhatynyń tóraǵasy Qanat Saqqulaqovqa óte uqsaıtyn adam jınalys kezinde jumys ornynda temeki shegip otyr, al qarapaıym azamattar qoǵamdyq oryndarda temeki shekkeni úshin birden jaýapkershilikke tartylady», — delingen Egov.press Telegram-arnasynda.
Qaraǵandy oblysy Polısıa departamenti NUR.KZ tilshisine vıdeoda shynymen aýdandyq máslıhat tóraǵasy beınelengenin rastady.
«Áleýmettik jelilerdi monıtorıńileý barysynda polısıa qyzmetkerleri Zoom platformasy arqyly ótken onlaın-jınalys kezinde qyzmettik kabınette er adamnyń elektrondyq temeki shegip otyrǵanyn kórsetetin beınejazbany anyqtady. Tekserý qorytyndysy boıynsha azamattyń jeke basy anyqtaldy. Ol Qaraǵandy oblysy Osakarov aýdanynyń máslıhat tóraǵasy bolyp shyqty», — dedi vedomstvonyń baspasóz qyzmeti.
Osy fakti boıynsha ol ákimshilik jaýapkershilikke tartylyp, aıyppul salyndy.
Qaraǵandy oblysy Polısıa departamenti laýazym, mártebe nemese qoǵamdyq jaǵdaı zań talaptaryn saqtaý mindetinen bosatpaıtynyn atap ótti.
«Zań men tártip barlyǵyna birdeı, eshkimge de erekshelik joq», — dep qosty vedomstvo.
Osakarov aýdandyq máslıhaty apparatynyń resmı saıtyndaǵy aqparatqa sáıkes, onyń tóraǵasy — Qanat Saqqulaqov.