Óskemen qalasynyń ákimi Almat Aqyshov turǵyndardy oblys ortalyǵyn Pavlodarmen salystyrmaýǵa shaqyrdy, qalalardyń ártúrli jaǵdaıda ekenin atap ótti, dep habarlaıdy infohub.kz saıty.
Qala basshysy birneshe aı ishinde atqarylǵan aýqymdy jol jóndeý jumystary týraly aıtty. «Bıyl biz qaladaǵy joldardy jóndeýge barynsha kóńil bóldik. Buǵan oblys ákimdigi zor qoldaý kórsetti. Óskemen men Pavlodarda jaǵdaı ártúrli. Pavlodarda 450 shaqyrym jol bolsa, bizde – 750 shaqyrym. Bul ártúrli kólemdegi jumys», – dedi Almat Aqyshov.
Ákimniń aıtýynsha, qalalyq joldardy jóndeýdiń mundaı qarqyny buryn bolmaǵan. Aldyńǵy jyldary maýsymda shamamen 20-25 shaqyrym jóndelse, bıyl 60 shaqyrymdy jańartý múmkin boldy.
«Osy qarqyndy saqtaı alsaq, joldarymyz kezeń-kezeńimen jaqsara túsedi. Biraq biz birden barlyq 750 shaqyrymdy jóndeı alamyz dep oılaýdyń qajeti joq. Sondyqtan jóndeýge bólingen qarajatty qalanyń ártúrli aýdandary arasynda bólýge týra keledi. Pavlodar bul turǵyda yqshamdaý», – dep túsindirdi ákim.
Almat Aqyshov bir jazda barlyq qalalyq joldardy jaqsy jaǵdaıǵa keltirýge bólingen qarajat jetkiliksiz ekenin de moıyndady. «Bıylǵy barlyq qosymsha búdjet qarajatyn joldarǵa baǵyttadyq. Keı jerlerde qarjylandyrý jetispeı jatqandyqtan, jumystardy qaryzǵa atqaryp jatyrmyz. Kelesi jyly da jol jóndeýdiń osyndaı qarqynyn saqtaýǵa tyrysamyz», – dep qosty ol.