Abaı oblysynda birneshe jyl boıy kórmegen bes jasar qyzymen sottalǵan azamattyń kópten kútken kezdesýi ótti, dep habarlaıdy infohub.kz saıty.
Oblys boıynsha QAJD baspasóz qyzmetiniń málimetinshe, Pavlodardyń 45 jastaǵy turǵyny esirtki saqtaǵany jáne ótkizgeni úshin jeti jylǵa bas bostandyǵynan aıyrylǵan. Jazasyn óteý úshin ol ortasha qaýipsizdik mekemesine jiberilgen. Keıinnen úlgili minez-qulqy, eńbekke adal qatynasy jáne rejım talaptaryn saqtaǵany úshin sottalǵan adam Abaı oblysy boıynsha QAJD mınımaldy qaýipsizdik mekemesine aýystyrylǵan.
Mınımaldy qaýipsizdik mekemesinde sottalǵan azamat qalany abattandyrýmen aınalysatyn kásiporyndardyń birine jumysqa ornalastyrylǵan. Mekeme qyzmetkerlerimen áńgimelesý kezinde ol otbasynyń aýyr taǵdyry men qyzymen kezdesýdi jyldar boıy kútkenin aıtyp bergen.
«Bostandyqtan aıyrylǵanǵa deıin meniń otbasym bolǵan - áıelim jáne kishkentaı qyzym. Men sottalǵannan keıin áıelim ajyrasýǵa ótinish berip, bir jasar qyzymdy anamnyń tárbıesine qaldyrdy. Densaýlyǵyna baılanysty anam balany jalǵyz tárbıeleı almaı, nemeresin balalar úıine berýge májbúr boldy. Keıin qyzymnyń júrek aqaýy bar ekenin jáne emdelý qajet ekenin bildim. Mekemege kelgenimde, ákimshilik maǵan jumysqa ornalasýǵa kómektesti. Turaqty jalaqy alyp, tapqan aqshamnyń barlyǵyn derlik qyzymnyń emine jiberdim. Qashyqtyqqa qaramastan oǵan qamqorlyq jasap, kómektesý men úshin mańyzdy boldy. Qazir qyzym bes jasta. Osy jyldar boıy biz baılanysta boldyq, jıi telefonmen sóılesip, kezdesý kúnin birge sanadyq. Mine, sol kún de keldi. Uzaq sapardan keıin qyzymdy kórip, qushaqtap, janymda bola aldym. Bul men úshin óte mańyzdy sát. Onymen kezdesý múmkindigi úshin rızamyn jáne bolashaqta qyzymnyń janynda bola alamyn jáne jańa ómir bastaımyn dep úmittenemin», - dedi sottalǵan adam.
«Bizdiń jumysymyzdyń mańyzdy mindetteriniń biri - sottalǵandardyń jaqyndarymen áleýmettik paıdaly baılanystaryn saqtaý jáne nyǵaıtý. Bul jaǵdaıda jumysqa ornalasý er adamǵa paıdaly eńbek daǵdylaryn meńgerip, belgilengen tártipti saqtaýǵa ǵana emes, sonymen qatar qyzyna qarjylaı kómek kórsetýge múmkindik berdi. Ol úshin balamen baılanysty saqtap, jeke kezdesýdi kútýdiń qanshalyqty mańyzdy bolǵanyn kórip otyrmyz», - dep atap ótti mekeme bastyǵynyń mindetin atqarýshy Rýstem Berlıbekov.