Pavlodarda qaınaǵan sýy bar shuńqyrǵa qulaǵan er adamǵa ótemaqy tólendi. Bul oqıǵaǵa «Pavlodar jylý jelileri» JSHS jaýapkershilik aldy, dep habarlaıdy infohub.kz saıty.
Oqıǵa er adam tórt jasar balasymen serýendep júrgen kezde boldy. Kenet onyń astyndaǵy trotýar qulap, pavlodarlyq qaınaǵan sýy bar shuńqyrǵa túsip ketti.
Zardap shekken adamnyń aıaǵy kúıik aldy. Denesiniń 7 paıyzy zaqymdanǵan. Qazir er adam aýrýhanada jatyr, jaǵdaıy ortasha aýyrlyqtaǵy dep baǵalanýda. Bala zardap shekken joq.
Jylý jelilerinde apattyń sebebi jylý qubyrynyń jarylýy bolǵanyn málimdedi. Tótenshe jaǵdaı bolǵan ýchaske sońǵy ret 15 jyl buryn jóndelgen. Oqıǵadan keıin zaqym joıylyp, shuńqyr qummen toltyryldy.
Kásiporyn er adamǵa ótemaqy tóledi, alaıda onyń mólsheri jarıalanbady. Jylý jelileriniń dırektorynyń aıtýynsha, zardap shekken adamnyń kompanıaǵa eshqandaı talaby joq.
Sonymen qatar, Pavlodardaǵy jylý jelileriniń tozýy 87 paıyzǵa jetedi. Jazda qubyrlardaǵy sýdyń temperatýrasy shamamen 65 gradýs bolsa, qysta ol 110 gradýsqa deıin jetýi múmkin.
«Pavlodar jylý jelileri» JSHS dırektory Anatolı Moıseı kásiporyn barlyq jerasty qubyrlarynyń jaǵdaıyn kúndelikti teksere almaıtynyn málimdedi.
«Bizdiń jylý jelileriniń uzyndyǵy 400 shaqyrymnan asady, tarmaqtardy qosqanda. Jer astynda jatqan osy qubyrdyń bárin aldyn ala boljaý múmkin emes. Ol bizde kúndelikti aınalyp ótip, qubyrdyń jaǵdaıyn tekserip, shara qoldana alatyn kanalda jatqan joq. Munda eshkim kepildik te bere almaıdy. Qazirgi ýaqytta osyǵan qatysty barlyq jumystardy júrgizip jatyrmyz», — dedi Moıseı.