Qazaqstanda bosandyrý kómegin kórsetetin uıymdarǵa aýqymdy tekserý júrgizilip, onyń barysynda 29 mekemede buzýshylyqtar anyqtaldy. infohub.kz saıtynyń habarlaýynsha, Densaýlyq saqtaý mınıstrligi osyndaı 84 mekemeniń 82-sin, onyń ishinde 35 perınataldyq ortalyq pen 47 bosandyrý bólimshesin teksergen.
Mamandar ınfeksıalyq qaýipsizdik talaptarynyń saqtalýyn baǵalap, zararsyzdandyrý jáne dezınfeksıa júıelerin, jeldetý men sýmen jabdyqtaýdy, sondaı-aq ınfeksıalardy anyqtaý tártibi men ınfeksıalyq baqylaý qyzmetteriniń jumysyn tekserdi. Zerthanalyq zertteýler de júrgizilip, bul qujattamany ǵana emes, medısınalyq kómek kórsetýdiń naqty jaǵdaılaryn da baǵalaýǵa múmkindik berdi.
Tekserý qorytyndysy boıynsha 81 sanıtarlyq nusqama berildi. Dezınfeksıalyq-zararsyzdandyrý rejıminiń buzylýy 29 medısınalyq uıymda tirkeldi. Táýekelderdi dereý joıýdy talap etetin faktiler boıynsha naqty sharalar qabyldanǵany aıtylǵan.
Densaýlyq saqtaý vıse-mınıstri Tımýr Sultanǵazıev óńirlerdiń densaýlyq saqtaý basqarmalaryna nusqamalardyń oryndalýyn aı saıyn baqylaýdy qamtamasyz etýdi jáne bosandyrý mekemeleriniń sanıtarlyq-tehnıkalyq jaǵdaıyn belgilengen talaptarǵa sáıkestendirýdi tapsyrdy. Sondaı-aq ınfeksıalyq baqylaý qyzmetteriniń kadrlyq qamtamasyz etilýin kúsheıtý, ınfeksıalardyń aldyn alý baǵdarlamalaryn jańartý jáne medısınalyq uıymdar basshylarynyń jeke jaýapkershiligin arttyrý tapsyryldy.
«Bizdiń mindetimiz – buzýshylyqty anyqtap, nusqama berý ǵana emes. Bir aıdan keıin qaıta oralyp, naqty nátıjeni kórýimiz kerek. Eger eskertý jasalsa, ol joıylýy tıis. Pasıenttiń qaýipsizdigi eseptermen emes, medısınalyq kómek kórsetýdiń naqty jaǵdaılarymen rastalýy kerek», – dep atap ótti Tımýr Sultanǵazıev.
Kelesi kezeńde balalar aýrýhanalary tekseriledi, odan keıin alǵashqy medısınalyq-sanıtarlyq kómek uıymdarynda da osyndaı jumys júrgiziledi.