Petropavl turǵyny alıment tóleýden júıeli túrde jaltarǵany úshin bir jylǵa bas bostandyǵynan aıyryldy. Onyń uly aldyndaǵy qaryzy 1,5 mln teńgege jetken. Bul týraly infohub.kz saıty habarlaıdy.
Soltústik Qazaqstan oblysynyń soty anyqtaǵandaı, er adam kámeletke tolmaǵan balasyn asyraý úshin alıment tóleýge mindetti bolǵan, biraq mindettemelerin oryndaýdan jaltarǵan. Onyń jınaqtalǵan bereshegi iri somaǵa jetken.
İs qaraý barysynda qazaqstandyqtyń naqty jumys taýyp, jalaqy alý múmkindigi bolǵany, alaıda ol bul múmkindikti paıdalanbaǵany jáne Jumyspen qamtý ortalyǵyna júginbegeni anyqtaldy. Sonymen qatar, turǵylyqty jeri boıynsha oǵan teris minezdeme berilgen jáne ol alıment tólemegeni úshin birneshe ret ákimshilik jaýapkershilikke tartylǵan.
«Túzelý múmkindigi berilgenine qaramastan, sottalýshy tıisti qorytyndy jasamady jáne balany asyraý boıynsha mindettemelerin oryndaýdan jaltarýyn jalǵastyrdy», — dep habarlady sotta.
Sondaı-aq sot Petropavl turǵyny 2021 jyldan beri ulymen baılanysta bolmaǵanyn, ony tárbıeleýge qatyspaǵanyn, onyń densaýlyǵy men taǵdyryna qyzyǵýshylyq tanytpaǵanyn anyqtady.
Sottalýshy kámeletke tolmaǵan balany asyraý boıynsha qarajat tóleý mindettemesin oryndamaǵany úshin kináli dep tanylyp, oǵan bir jyl bas bostandyǵynan aıyrý jazasy kesildi. Úkim zańdy kúshine endi.
Buǵan deıin Astana turǵynynyń aýrýyna baılanysty alıment kólemin azaıtýǵa tyrysqany, biraq sot oǵan senbegeni habarlanǵan bolatyn.