Soltústik Qazaqstan oblysynda oblys ortalyǵyna sıntetıkalyq esirtkiniń iri partıasyn jetkizý áreketiniń joly kesildi. Quqyq qorǵaý organdary tyıym salynǵan zattardy satýǵa kúdikti Jambyl oblysynyń 42 jastaǵy turǵynyn ustady, dep habarlaıdy infohub.kz saıty.
«Ońtústik» baqylaý-ótkizý pýnktinde tártip saqshylarynyń nazaryn er adam bir táýlikke jaldaǵan Chevrolet Cobalt kóligi aýdartty. Kólikti tekserý kezinde salonnan paketterge bólingen eki paket psıhotroptyq zat tabylyp, tárkilendi.
Júrgizilgen saraptama tárkilengen zattyń α-PvP sıntetıkalyq esirtki ekenin anyqtady. Zattyń jalpy massasy 120 gramdy qurady.
Ustalǵan adam esirtkini erekshe iri mólsherde satty degen kúdikke ilindi. Sonymen qatar, medısınalyq kýálandyrý onyń kannabınoıdterdi tutynǵanyn rastady.
Qazirgi ýaqytta kúdikti qamaýǵa alyndy. Onyń kinási dáleldengen jaǵdaıda, oǵan jeti jyldan on eki jylǵa deıin bas bostandyǵynan aıyrý jazasy qaýip tóndiredi.
Bıylǵy jyldyń basynan beri oblys polıseıleri Petropavlǵa esirtki jetkizýdiń 26 arnasyn jaýyp úlgerdi.
Buǵan deıin Astanada sıntetıkalyq esirtkini saqtaý jáne taratý kúdigimen 19 jastaǵy jigit ustalǵany habarlanǵan bolatyn. Jaldamaly kólik pen jaldamaly páterden polısıa jalpy salmaǵy bir kelige jýyq mefedron tapqan. Osy fakti boıynsha qylmystyq is qozǵalyp, kúdikti ýaqytsha ustaý ızolátoryna qamaldy. Quqyq qorǵaý organdary oqıǵanyń mán-jaıyn jáne yqtımal sybaılastardy anyqtap jatyr.