Sheteldik qurylymdarǵa tıesili «Potensıal Oıl» munaı óndirý kompanıasy ekologıalyq zańnamany buzǵany úshin memleketke 1,43 mlrd teńge ákimshilik aıyppul tóledi. Aıyppuldardy sotta daýlaý áreketteri nátıjesiz aıaqtaldy — birinshi jáne apelásıalyq satydaǵy sottar shaǵymdardy qanaǵattandyrýsyz qaldyrdy, dep habarlaıdy infohub.kz saıty.
Atyraý oblysy boıynsha ekologıa departamentiniń málimetinshe, vedomstvo kompanıanyń ekologıalyq talaptardy saqtaýyn tekserip, nysanǵa baryp profılaktıkalyq baqylaý júrgizdi. Tekserý qorytyndysy boıynsha óndiristik ekologıalyq baqylaý, aǵyndy sýlardy monıtorıńileý jáne ekologıalyq eseptilik talaptarynyń buzylǵany anyqtaldy.
Sonymen qatar tekserýshiler lastaýshy zattardyń shyǵaryndylary jáne tıisti ekologıalyq ruqsattarsyz jekelegen jumystardyń júrgizilýi, ruqsat etilgen shyǵaryndylar normatıvteriniń asyp ketýi, sondaı-aq qaldyqtardy óńdeý kezindegi buzýshylyqtardy anyqtady.
Kásiporynda qajetti ruqsattar men bekitilgen lımıttersiz jınalǵan lastanǵan topyraq pen túptik shlam da tabyldy. Buǵan qosa, qaldyqtardy basqarý baǵdarlamasy túziletin qaldyqtardyń naqty kólemine sáıkes kelmedi.
Barlyǵy departament 37 ákimshilik quqyq buzýshylyq týraly hattama toltyryp, jalpy somasy 1 433 815 923 teńgege jetetin jeti aıyppul qaýlysyn shyǵardy.
«Potensıal Oıl» qabyldanǵan sharalarǵa sot tártibimen shaǵymdandy. Alaıda birinshi jáne apelásıalyq satydaǵy sottar kompanıanyń shaǵymdaryn qanaǵattandyrýsyz qaldyrdy. Nátıjesinde aıyppuldyń barlyq somasy — 1,4 mlrd teńgeden astamy — memleket kirisine óndirilip alyndy.
Adata derekterine sáıkes, «Potensıal Oıl» qatysýshylary — Datum Base Project Development-FZCO jáne First International Oil Corporation Limited S.À R.L. (FIOC). Datum Base Project Development-FZCO Birikken Arab Ámirlikterinde, al FIOC Lúksembýrgte tirkelgen.
«Potensıal Oıl» negizgi qyzmet túri — shıki munaı jáne ilespe gaz óndirý. Kompanıanyń 2025 jylǵy qorytyndysy boıynsha paıdasy 2,6 mlrd teńge boldy, bul ótken jylǵy 2,9 mlrd teńgeden az.
Kompanıanyń 2025 jylǵy 31 jeltoqsandaǵy eseptiligine sáıkes, onyń aksıalarynyń 80%-y BAÁ-de tirkelgen Selford International FZCO-ǵa, taǵy 20%-y FIOC-qa tıesili bolǵan. Kompanıanyń túpkilikti baqylaýshy tarapy retinde Ázirbaıjan jáne Reseı azamattary — Kanan Hýdaverdıev pen Edýard Hýdaınatov kórsetilgen.
«Potensıal Oıl» Atyraý oblysy Isataı aýdanyndaǵy Begaıdar ýchaskesinde kómirsýtek shıkizatyn barlaý, óndirý jáne bólýge 2001 jylǵy 4 sáýirdegi №651 kelisimshart, sondaı-aq taý-ken óndiristerin paıdalanýǵa 2006 jylǵy 24 mamyrdaǵy №0003738 bas lısenzıasy negizinde jumys isteıdi.
Munaı saqtaý nysandary men magıstraldyq munaı qubyrlaryn paıdalanýdy kompanıa 2033 jylǵy 15 maýsymǵa deıin qoldanystaǵy №000100-06 jáne №000113-06 lısenzıalary boıynsha júzege asyrady.
Budan bólek, kásiporyn sol Atyraý óńirindegi Jańatalap-2 ýchaskesinde 2008 jylǵy 19 tamyzdaǵy №187/2008 kelisimshartqa sáıkes keń taralǵan paıdaly qazbalardy, atap aıtqanda sazdy jynystardy óndirýmen aınalysady.
Buǵan deıin «Kýrsıv» Qazaqstan Qashaǵan operatorynan 2,3 trln teńge aıyppul óndirýdi toqtatqanyn jazǵan bolatyn.