InfoHub Logo

Qazaqstan muǵalimderin attestasıalaý júıesinde eleýli ózgerister qarastyrylýda. Jańa júıe boıynsha muǵalimder endi óz páni boıynsha bilimin dáleldeıtin synaq tapsyrmaıdy. Bul ózgeris pedagogter arasynda qyzý talqylaý týdyrdy.

Bul týraly Infohub.kz aqparat agenttigi habarlaıdy.

Pándik testten kimder bosatylady?

Buryn muǵalimder biliktilik sanatyn alý úshin pándik synaqtan ótýge mindetti bolatyn. Alaıda, jańa júıede bul talap alynyp tastalady. Bul ózgeris pedagogterdiń sanaty kóbeıýine yqpal etýi múmkin.

Bilim berý salasyndaǵy sarapshy Aıatjan Ahmetjanuly bul jańalyqqa qarsy shyǵyp, muǵalimniń óz pánin jetik bilýi jáne kez kelgen synaqtan óte alýy kerektigin alǵa tartady. Onyń aıtýynsha, mınıstrlik málimetteri boıynsha, bıyl qańtarda muǵalimderdiń 52,6%-y pándik testten óte almaǵan. Sondyqtan testti alyp tastaý – damýǵa degen umtylysty joıyp, kásibı ósýdi tejeýmen teń deıdi sarapshy.

Al QR Aǵartý mınıstrligi janyndaǵy qoǵamdyq keńes múshesi Omyr Shynybekýly pándik testtiń alynýyn quptaıdy. Ol sońǵy jyldary test tapsyrý kezinde sybaılas jemqorlyq táýekelderiniń artqanyn aıtady. Testten bas tartý júıeni muǵalimder men qoǵam úshin de anaǵurlym ashyq ári yńǵaıly etedi dep sanaıdy.

Attestasıadan ótýshilerge qandaı ózgerister bar?

Bıyl attestasıadan ótýdi bastaǵan muǵalimder eski júıe boıynsha jumystaryn aıaqtaıdy. Buǵan deıin 51 myń muǵalim testten ótip, qajetti bal jınaǵan. Olar portfolıolaryn usynyp, attestasıanyń qalǵan kezeńderinen óte alady. Sátti aıaqtaǵandar qyrkúıekten bastap tıisti qosymsha aqy ala bastaıdy.

Alǵashqy testten ótý balyn jınaı almaǵan, biraq tıisti portfolıosy bar muǵalimderge shilde aıynda testti qaıta tapsyrýǵa múmkindik beriledi. Eger qaıta tapsyrýdan keıin de qajetti bal jınalmasa, biliktilik sanaty berilmeıdi.

Qaıta test tapsyrýdan bas tartqan muǵalimder qyrkúıekte pılottyq rejımde engiziletin jańa model aıasynda attestasıaǵa qatysa alady.

Pándik testten tek qazirgi muǵalimder ǵana bosatylady. Al jaqynda ǵana joǵary oqý ornyn bitirgen jas mamandar úshin test tapsyrý mindetti bolyp qalady. Olar eki jyldan keıin bul synaqty qaıta tapsyrýǵa tıis bolady.

Muǵalimderdiń júktemesi azaıady

Jańa erejeler muǵalimder úshin qosymsha talaptardy alyp tastaıdy. Endi esse jazý, ǵylymı maqala jarıalaý, avtorlyq baǵdarlamalar men oqý-ádistemelik materıaldar ázirleý mindetti bolmaıdy. Bul muǵalimderdiń ýaqytyn únemdep, bilim berý prosesine kóbirek kóńil bólýine múmkindik beredi.

Omyr Shynybekýlynyń pikirinshe, ǵylymı jumysty mindetti talaptardan alyp tastaý – durys sheshim. Sebebi muǵalim – eń aldymen pedagog, ǵylymı qyzmetker emes.

Aıatjan Ahmetjanuly bul pikirmen kelispeıdi. Onyń oıynsha, esse, ǵylymı maqalalar, avtorlyq baǵdarlamalar bilim sapasynyń mańyzdy bóligi sanalady. Olardy tolyq alyp tastaý salaǵa keri áser etýi múmkin. Sarapshy bul talaptardy eń joǵary sanatqa úmitkerler úshin qaldyrýdy usynady.

Ashyq sabaqtar men praktıkalyq jumys – basty baǵalaý krıterııi

Jańa modelde ashyq sabaqtar sany men biliktilik sanatyn alý úshin qajetti biliktilikti arttyrý saǵattary qysqartylady. Pedagogtiń praktıkalyq nátıjelerine, jobalarǵa qatysýyna jáne tárbıelik qyzmetine basa nazar aýdarylady.

Vıse-mınıstr Shynar Aqparovanyń aıtýynsha, jańartylǵan tásil muǵalimniń jumysyn tek akademıalyq kórsetkishter boıynsha ǵana emes, oqýshylardyń tulǵalyq damýyna qosqan naqty úlesi arqyly baǵalaýdy kózdeıdi.

«Pedagog-moderator» sanatyna qoıylatyn talaptar qaıta qaralýda. Buryn jylyna bes ashyq sabaq ótkizý qarastyrylsa, endi attestasıa kezeńinde barlyǵy tórt sabaq jetkilikti. Sonymen qatar, biliktilikti arttyrý kýrstarynyń kólemi 72-den 36 saǵatqa deıin qysqartylady.

Osylaısha, baǵalaýdyń negizgi krıterııleri muǵalimniń mektep jobalary, shyǵarmashylyq toptarǵa qatysýy, synyp saǵattaryn ótkizýi jáne synyptan tys is-sharalar bolady.

Vıse-mınıstrdiń aıtýynsha, «pedagog-sarapshy», «pedagog-zertteýshi» jáne «pedagog-sheber» sanattaryna da osyndaı ózgerister engiziledi.

«Ustaz» platformasy

Bolashaqta qaǵaz portfolıolardy jınaý tájirıbesi tolyǵymen alynyp tastalyp, júıe elektrondy formatqa kóshedi. Biliktilik sanattaryna attestasıa «Ustaz» platformasy arqyly júrgiziledi. Muǵalimder týraly derekter birneshe memlekettik derekqordan avtomatty túrde kelip túsedi: jumys orny, eńbek ótili, bilim deńgeıi jáne kásibı jetistikteri bir júıede jınaqtalady. Bul qaǵazbastylyqty tolyǵymen joıýǵa múmkindik beredi.

Qazirdiń ózinde platforma muǵalimder tarapynan belsendi qoldanylýda. Ótken jyly avtomattandyrylǵan júıede tek «pedagog-moderator» jáne «pedagog-sarapshy» sanattaryna attestasıa júrgizildi. Bolashaqta qalǵan sanattardy da platformaǵa kóshirý josparlanýda. Bir jyl ishinde «Ustaz» arqyly 93,1 myń muǵalim biliktilik sanatyn alýǵa ótinish berdi.

Muǵalimderdiń biliktilik sanatyn alýǵa degen umtylysy tek kásibı talaptarmen ǵana emes, qosymsha tólemdermen de baılanysty. Máselen, «pedagog-master» laýazymyna 50%, «pedagog-zertteýshi» – 40%, «pedagog-sarapshy» – 35%, al «pedagog-moderator» – 30% qosymsha aqy alady.