InfoHub Logo

Qazaqstanda sıyr etinen úsh ese arzan ettiń jańa túri paıda boldy. Bul – saıǵaq eti. Endi bul janýardyń eti resmı túrde saýda jelileri men arnaıy naryqtarda satyla bastady.

Bul týraly Infohub.kz aqparat agenttigi habarlaıdy.

Regýlásıadan óndiriske deıin

Saıǵaq etinen jasalǵan konserviler 2025 jyldyń qańtarynan bastap dúken sórelerinde paıda bolsa, jaz aılarynda salqyndatylǵan týshalardy arnaıy satý oryndarynda satý jumystary jandandy. Sóıtip, dala antılopasy popýlásıasyn basqarý prosesi tolyqqandy óndiristik modelge aınaldy.

Bul retteý jumystaryn Ekologıa mınıstrligi janyndaǵy «Ohotzooprom» RMQK qyzmetkerleri men Saýda mınıstrliginiń Tehnıkalyq retteý jáne metrologıa komıteti baqylaıdy. 2025 jyly 35 lısenzıalanǵan soıý obektisiniń 27-si jumysqa tartyldy. Olar elimizdiń jeti óńirinde ornalasqan:

Barlyq nysandar veterınarlyq-sanıtarlyq talaptarǵa sáıkestigi boıynsha tekserilip, soıý sehtarymen, muzdatqysh kameralarmen jáne sýmen jabdyqtaý júıelerimen jabdyqtalǵan.

Satylym aldyndaǵy tekserýler

Jabaıy janýar etiniń qaýipsizdigi – eń mańyzdy másele. Aýyl sharýashylyǵy mınıstrliginiń málimetinshe, soıý obektilerine 196 120 bas saıǵaq eti túsken. Árbir týsha mindetti túrde tekserýden ótedi.

İshki organdar men bastyń organoleptıkalyq tekserisi, lımfa bezderiniń ashylýy júrgiziledi. Sondaı-aq, qaınatý synaǵy, fınoz (sıstıserkoz) boıynsha zertteý jáne jalpy radıasıalyq fondy anyqtaý mindetti bolyp sanalady. El ishinde barlyǵy 137 381 týsha satyldy. Bul ónimge shyǵý tegi men qaýipsizdigin rastaıtyn 1729 veterınarlyq anyqtama berilgen.

«Ohotzooprom» RMQK-dan seriktes kásiporyndardyń et satyp alý baǵasy jarıalanbaıdy. Bul málimetter komersıalyq qupıa bolyp sanalady. Alaıda, bólshek saýda baǵalary jarıalanǵan.

2026 jyldyń basyndaǵy málimet boıynsha, bir kılogramm saıǵaq etiniń baǵasy 1300-2400 teńge aralyǵynda. Eń kóp suranysqa ıe segment – 1600-1800 teńge. Salystyrar bolsaq, keıbir óńirlerde sıyr etiniń baǵasy kılogramyna 4000 teńgeden asady.

«Veterınarıa týraly» Zańnyń 22-babyna sáıkes, janýar tektes ónimderdi saraptamasyz satýǵa tyıym salynǵan. Resmı naryqtar men dúkenderde memlekettik ınspektorlar kúndelikti veterınarlyq anyqtama men soıý obektisiniń móriniń bar-joǵyn, tasymaldaý kezindegi temperatýralyq rejımniń saqtalýyn, sondaı-aq zerthanalyq zertteýlerdiń nátıjelerin tekseredi.

Salalyq komıtet saıǵaq etin tek arnaıy belgilengen oryndardan satyp alýǵa jáne ilespe qujattardy talap etýge keńes beredi.

Teri jáne eksport

Etten bólek, memleket janama shıkizatty da paıdalanýdy josparlap otyr. Qazaqstanda jyl saıyn 3,3 mıllıon iri qara mal terisin óńdeýge qabiletti 11 kásiporyn jumys isteıdi. Olardyń tehnıkalyq bazasy saıǵaq terisin de óńdeı alady.

Sonymen qatar, syrtqy naryqtardy ashý boıynsha jumystar júrgizilýde. Aýyl sharýashylyǵy mınıstrligi Qytaı, Sıngapýr, Malaızıa, Vetnam jáne Japonıanyń veterınarıalyq qyzmetterine tiri saıǵaqtardy, olardyń bólikteri men týyndylaryn, sonyń ishinde múıizderin ımporttaý talaptaryn alý maqsatynda resmı saýaldar joldady.

Bul talaptar alynǵannan keıin mınıstrlik eksportqa arnalǵan veterınarlyq sertıfıkattardy kelisý rásimin bastaýdy josparlap otyr. Nátıjeleri týraly syrtqy ekonomıkalyq qyzmetke qatysýshylarǵa qosymsha habarlanatyny aıtyldy.

Nátıjesinde, saıǵaqtar sanyn retteý jónindegi bastama ishki naryqta jańa taýar sanatyna aınaldy. Endigi basty suraq – qazaqstandyqtar ádettegi sıyr etine balama retinde arzan nusqany tańdaýǵa daıyn ba?