Pavlodar, Qaraǵandy, sondaı-aq ishinara Aqmola jáne Qostanaı oblystarynyń dıqandary qolaısyz aýa raıyna tap boldy — bıylǵy aptap ystyq pen qýańshylyq kartop ónimine áser etti. Fermerler ónim baǵasynyń yqtımal ósýin boljady, dep habarlaıdy infohub.kz saıty.

Qazirgi tańda Qaraǵandy oblysynda jınaý jumystary júrip jatyr, fermerlerdiń boljamdary oń. Olardyń aıtýynsha, ónim byltyrǵydan az bolǵanymen, aldyńǵy jylǵydan kóp. Kartop usaq, alaıda saqtalýy jaqsyraq bolýy tıis.

«Iá, Qaraǵandy oblysy boıynsha osy 80 kúndik aptap ystyq boldy. Ol kartop úshin azdap kúızelis týdyrdy. Degenmen, kóptegen áriptesterimmen sóılesip júrmin, ónim bar, kartoptyń sapasy óte jaqsy», — dedi agronom, «Evrazıa Invest» JSHS jáne «Agrokrestánskı dvor» JSHS menedjeri Aleksandr Matvıenko.

Dıqandar tapshylyq bolmaıdy dep esepteıdi, óıtkeni kóptegen fermer kartop egistik alqaptaryn ulǵaıtty. Aýyl sharýashylyǵy mınıstrligi ázirge eshqandaı másele kórip otyrǵan joq. Onda ónimdilik gektaryna 26,4 tonna dep baǵalanyp otyr.

«Kartop negizinen sýarmaly jerlerde ósiriledi, sondyqtan ony óndirý aýyl sharýashylyǵy alqaptarynyń sýarý sýymen qamtamasyz etilýine tikeleı baılanysty. Jalpy, bıyl sýarýǵa qajetti sý resýrstarynyń tapshylyǵy baıqalǵan joq. Jergilikti atqarýshy organdardyń dereginshe, vegetasıa kezeńinde kartop egisiniń 100%-y jaqsy jáne qanaǵattanarlyq jaǵdaıda boldy», — dedi mınıstrlikte.

Fermerler kartopty kelisimine 100–110 teńgeden, al qoımasy joq keıbireýleri 80 teńgeden de satyp jatyr. Agrarılerge qosylǵan qun salyǵynyń ósýi de áser etti. Kóbisi tapsyrys bergen tehnıkasyn satyp alý úshin jyl basynda qosymsha nesıe alǵan.

«Kópshilik qazir salyq pen nesıe júktemesin azaıtý úshin nesıelerin jabýǵa tyrysýda. Olar kartopty tómendetilgen baǵamen satyp jatyr. Meniń úıimde dúken bar, qarapaıym saýda dúkeni, onda suryptalǵan kartop kelisine 300 teńgeden satylady. Al osy dúkenge jetkizip otyrǵan sharýashylyq 100 teńgeden beretinin naqty bilemin. Osy 200 teńge qaıdan, qaı kezeńde shyqty?» — dedi Qazaqstan kartop jáne kókónis ósirýshiler odaǵynyń tóraǵasy Baıjan Ýalıhanov.

Fermerlerdiń barlyǵy derlik deldaldar arqyly jumys isteıdi, keıde olardyń sany 3–4 býynǵa jetedi. Sharýalardyń óz logıstıkalyq kompanıasyn quryp, sýpermarketterge shaǵyn partıamen tasymaldaý múmkindigi joq. Kartop ósirýshiler odaǵy memleket baǵany retteýge kirisse, deldaldarǵa nazar aýdaratyn ýaqyt keldi dep esepteıdi.