Mańǵystaý oblysynda belgili jýrnalıs, aqyn, Qazaqstan Jýrnalıser odaǵy syılyǵynyń laýreaty Jolaman Boshalaq qaıtys boldy, dep habarlaıdy infohub.kz saıty.
Mańǵystaý oblysynyń qoǵamdyq komýnıkasıalar ortalyǵynyń málimetinshe, 1943 jyly Atyraý oblysynyń Emba aýdanyndaǵy Turǵyzba aýylynda dúnıege kelgen Jolaman Boshalaqtyń ómiri men shyǵarmashylyq jolynyń edáýir bóligi Mańǵystaý oblysymen tyǵyz baılanysty boldy. Ol uzaq jyldar boıy jýrnalısıka salasynda eńbek etip, oblystyq teledıdar men baspasózdiń damýyna erekshe úles qosty.
Ár jyldary ol Mańǵystaý oblystyq teleradıokompanıasynda, «Komýnıstik jol», «Mańǵystaý» gazetterinde jumys istedi, sondaı-aq «Egemen Qazaqstan» gazetiniń oblys boıynsha menshikti tilshisi bolyp, aımaqtyń tirshiligin aqparattyq keńistikte keńinen jarıalady. Ásirese «Mańǵystaý» gazetin basqarǵan jyldary ol aımaq jýrnalısıkasynyń damýyna eleýli úles qosty.
«Jolaman Boshalaq — kásibı jýrnalısıkaǵa adaldyǵymen, jazýshylyq sheberligimen jáne azamattyq ustanymymen áriptesteriniń qurmetine bólengen úlken býyn ókili. Onyń aımaqtyq jýrnalısıkanyń damýyna qosqan úlesi men keıingi urpaqqa qaldyrǵan shyǵarmashylyq murasy halyq jadynda saqtalady. Marqumnyń otbasy men týystaryna, áriptesteri men jaqyndaryna qaıǵyra kóńil aıtamyz. Jatqan jeri jaıly, topyraǵy torqa bolsyn», — dep atap ótti ortalyqta.