Qazaqstanda qurylys salasyndaǵy jeke kásipkerlerdi ózin-ózi jumyspen qamtyǵandar mártebesine aýystyrý talqylanyp jatyr. Ónerkásip mınıstrliginiń Qurylys isteri jónindegi komıtetiniń tóraǵasy vedomstvo osyndaı múmkindikti pysyqtap jatqanyn málimdedi. Alaıda onyń aıtýynsha, bul salynyp jatqan baspana qunyna áser etpeıdi, dep habarlaıdy infohub.kz saıty.
Ortalyq komýnıkasıalar qyzmetinde ótken brıfıńte jýrnalıser qurylys salasyndaǵy jeke kásipkerlerdiń jumysyndaǵy qıyndyqtarǵa nazar aýdardy. Olar neǵurlym kúrdeli salyq rejımine kóshýge májbúr, óıtkeni olardyń tapsyrys berýshileri — iri qurylys kompanıalary — ońaılatylǵan rejımdegi merdigerlerdiń qyzmetine jumsalǵan shyǵyndardy korporatıvtik tabys salyǵyn esepteý kezinde esepke ala almaıdy. Sarapshylardyń baǵalaýynsha, bul baspana qunynyń qymbattaýyna ákeledi.
Buǵan deıin Qurylysshylar qaýymdastyǵy qurylys qyzmetiniń 12 túrin ózin-ózi jumyspen qamtyǵandarǵa ruqsat etilgen tizimge qosýdy usynǵan bolatyn. BAQ ókilderi ónerkásip mınıstrligi osy máseleni qarastyryp jatqanyn surady.
Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov vedomstvonyń shynymen de osyndaı usynysty qarastyryp jatqanyn rastady.
«Bul jerde eń aldymen mynany túsiný kerek: bul tetik sharshy metrdiń qunyna áser etpeıdi. Nege? Óıtkeni kez kelgen jaǵdaıda salyq tóleýshi retinde qurylys salýshy QQS-ty tolyq kólemde tóleıdi. Ol salyq tólemeıtinmen jumys isteı me, álde tóleýshimen be — mańyzdy emes. Ekinshiden, pysyqtaý júrip jatyr. Iá, bári durys, mundaı usynystar tústi», — dedi Baqytjan Júnisbekov.
Komıtet tóraǵasynyń aıtýynsha, olar bul másele boıynsha ekonomıka mınıstrliginiń ustanymyn áli alǵan joq, qurylysshylardy ózin-ózi jumyspen qamtyǵandar qataryna qosý týraly usynys ázirge jumys barysynda.
Buǵan deıin Qazaqstan qurylysshylar odaǵy elimizde qurylys salasyndaǵy jeke kásipkerlerdiń sany qysqaryp jatqanyn málimdegen. Bir jylda olardyń sany shamamen 11%-ǵa azaıdy. Bul iri qurylys kompanıalarymen jumys isteýdegi salyq ózgeristerimen baılanystyryldy. Qazaqstan Respýblıkasy qurylysshylar odaǵy prezıdentiniń orynbasary Vácheslav Lazarevtiń baǵalaýynsha, ońaılatylǵan rejımde jumys isteıtin merdigerlerdiń qurylys kompanıalary qurylymyndaǵy úlesi 15%-dan 50%-ǵa deıin bolýy múmkin. Ol sondaı-aq bul jumystardyń 10-15%-ǵa qymbattaýyna ákelgenin málimdedi.