Qazaqstandyq júrgizýshiler kólikterine RFID-metkalardy ornatý múmkindigine ıe boldy. Bul metkalar aqyly trassalardaǵy tólem pýnktterinen tez ótýge jáne aqsha únemdeýge múmkindik beredi. «QazAvtoJol» engizgen aqyly jol ýchaskelerindegi jol aqysyn tóleýdiń jańa tásili týraly infohub.kz saıty habarlaıdy.
Arnaıy RFID-metkalar tólem pýnktinen ótken kezde avtomatty túrde iske qosylady. «QazAvtoJol» túsindirgendeı, metka memlekettik tirkeý nómirine jáne KazToll servısindegi paıdalanýshynyń jeke shotyna baılanystyrylady. Kólik quraly ótken kezde júıe ony sáıkestendirip, shottan avtomatty túrde esep aıyrysady. Júrgizýshige shotynda aqsha bolýy jetkilikti — qalǵanyn júıe ózi jasaıdy. Osynyń arqasynda ótkizý pýnktterinen ádettegiden áldeqaıda jyldam ótýge bolady.
Alaıda RFID-metkasy bar júrgizýshiler tek ýaqytyn ǵana emes, aqshasyn da únemdeı alady.
Sebebi Qazaqstandaǵy aqyly jol ýchaskelerinde tólemniń eki nusqasy bar:
aldyn ala tóleý — aqsha ótkizý pýnktinen ótken kezde alynady. RFID-metka arqyly da dál osylaı tólenedi, bul prosesti jyldamdatady;
keıin tóleý — júrgizýshi ótkizý pýnktinen ótkennen keıin jol aqysyn ózi tóleıdi.
Aldyn ala tóleý kezinde jol aqysy, ádette, tómenirek. Mysaly, Shýchınsk — Kókshetaý trassasynyń aqyly ýchaskesinde jeńil avtomobıldiń júrýi aldyn ala tóleý boıynsha shamamen 117,21 teńge, al keıin tóleý boıynsha 140,56 teńgeni quraıdy. Almatydan Qonaev qalasyna deıin aldyn ala tóleý 152 teńge, keıin tóleý 176 teńge bolady.
Aıyrmashylyq bir qaraǵanda azdaı kórinedi, biraq aqyly jol ýchaskelerinde jıi júretin júrgizýshiler úshin, ásirese júk kólikteri úshin, ol aıtarlyqtaı seziledi.
Mańyzdy: RFID-metkanyń ózi jeńildik bermeıdi, biraq ol tólem ótkizý pýnktinen ótken sátte júrgiziletindikten, azyraq tóleýge múmkindik beredi — bastysy shotta qajetti soma bolýy kerek. Aıta keteıik, aldyn ala tóleý metkasyz da qoljetimdi. Eger júrgizýshiniń shotynda aqsha bolsa, soma avtomatty túrde shegeriledi. Al metka búkil prosesti jyldamdatady. Ony tólem pýnktterinen tegin alýǵa bolady.
Buǵan deıin biz kólik nómirinen aqsha ýaqytynda alynbasa nemese jumsalmasa, onyń «janyp ketetini» týraly da jazǵan bolatynbyz. Al aqyly joldaǵy jol aqysyn únemdeý úshin júıeni «aldaýǵa» tyrysýǵa bola ma, sony osynda bilýge bolady.