Shyǵys Qazaqstan oblysynyń Rıdder qalasynda turǵyndar aıýlardyń izin jıi baıqaı bastady. Qala ákimdiginiń málimetinshe, jyrtqyshtardy izdeý úshin jedel jaýap berý toby jiberilgen, dep habarlaıdy infohub.kz saıty.
Rıdder turǵyndary tapqan aıý izderiniń fotosýretterin Instagram-daǵy noks_oskemen paraqshasy jarıalady. "GES artyndaǵy baqshalar aýdanyndaǵy topyraq joldan aıýdyń jańa izderi tabyldy", — delingen jazbada.
Shyǵys Qazaqstan oblysy tabıǵı resýrstar jáne tabıǵat paıdalanýdy retteý basqarmasynyń habarlaýynsha, azamattardyń ótinishi boıynsha 25 tamyzdan bastap Rıdderde orman jáne ańshylyq sharýashylyǵy jedel jaýap berý tobynyń eki ekıpajy jumys istep jatyr. "Eldi mekenderge jaqyndaǵan aıýlarǵa qatysty reıdtik is-sharalar ótkizilýde. Bul baǵytta arnaıy quraldar: drondar, teplovızorlar, arnaıy kólikter qoldanylýda. Jumys táýlik boıy júrgizilýde. Bul jumys kúzdiń sońyna deıin jalǵasady. Turǵyndarmen sóılesemiz, aıýlar týraly aqparat alamyz, osy aqparat boıynsha sol aýdandy óńdeımiz", — dedi vedomstvo ókilderi.
Eske sala keteıik, 24 tamyzda Shyǵys Qazaqstan oblysynda aıýdyń adamǵa shabýyl jasaǵany belgili bolǵan edi. Kýágerlerdiń aıtýynsha, omartada jumys istegen 58 jastaǵy er adam zardap shekken. Keıin zardap shekken adamnyń ózi bolǵan oqıǵanyń mán-jaıyn aıtyp berdi.