Rýdnyıda polısıa qyzmetkeriniń bir aýyz sózi kóp satyly alaıaqtyq sqemasyn kúl-talqan etti — jergilikti turǵyn ázer qutyldy, dep habarlaıdy infohub.kz saıty.
Qostanaı oblysy polısıa departamentiniń baspasóz qyzmeti málim etkendeı, tańerteń áıelge energetıkalyq kompanıadan habarlasyp, tekserý josparlanǵanyn aıtqan. «Elektrondyq kezek» alý úshin odan habarlamadaǵy kodty ataýdy suraǵan.
«Jumysta bolyp, qatelesip kodty atap qoıdym. Sodan keıin maǵan HQO-dan habarlasyp, alaıaqtardyń shabýylyna ushyraǵanymdy, endi bárin buǵattaý kerektigin aıtty», — dedi áıel.
Keıin baılanysqa ózin kıberpolısıa qyzmetkerimin dep tanystyrǵan er adam shyqty. Ol áıeldi eGov-tegi qujattar men derekterdi buǵattaý qajettigine sendirip, únemi jelide ustap, ekinshi telefondy tabýdy talap etti. Áńgime WhatsApp arqyly jalǵasty. Suhbattasýshy kamerasyn qospaı, áıelge túrli «qujattar» jiberip, óziniń shynaıylyǵyna sendirýge tyrysty.
Qala turǵyny ekinshi telefonnan bolyp jatqan jaǵdaıdy polısıa qyzmetkerine jetkizip úlgerdi. Ol dereý oqıǵa ornyna kelip, áńgimege ózi qosyldy.
«Alaıaqtar áıeldi is júzinde «qarmaqta» ustap, baılanysty úzbedi. Men ózimdi polısıa qyzmetkerimin dep tanystyryp, suhbattasýshydan kamerany qosyp, betin kórsetýdi talap ettim, qońyraý shalýshynyń qylyǵy kúrt ózgerdi. Nátıjesinde alaıaqtarmen odan ári sóılesýdi toqtattyq», — dedi Rýdnyı qalalyq polısıa basqarmasynyń qoǵamdyq qaýipsizdik bóliminiń bastyǵy Erlan Abdýlmanov.