Memlekettik kirister komıteti keıbir qazaqstandyqtarǵa tabystardy kórsetý kezinde anyqtalǵan sáıkessizdikter týraly habarlama jiberdi, dep habarlaıdy infohub.kz saıty.
Komıtettiń málimetinshe, kameraldyq baqylaý nátıjesinde jalpy belgilengen salyq salý tártibinde jumys isteıtin jeke kásipkerlerdiń tabystaryn tolyq kórsetýde sáıkessizdikter anyqtalǵan. Sondaı-aq sharýa nemese fermer qojalyqtary úshin arnaıy salyq rejımin qoldanatyn salyq tóleýshiler de qatelikter jibergen. Bul 2025 jylǵy kezeńge qatysty.
«Sáıkessizdikter salyq nysandarynyń, elektrondyq shot-faktýralardyń (ESHF), ekinshi deńgeıli bankterdiń aqparatynyń (POS-termınaldar men mobıldi tólemder) jáne ózge de aqparat kózderiniń derekterin zerdeleý men taldaý negizinde anyqtaldy. Kameraldyq baqylaý nátıjeleri boıynsha salyq tóleýshilerge tıisti habarlamalar jiberildi», — delingen resmı málimdemede.
Komıtette salyq tóleýshilerdiń sáıkessizdikterdi óz betinshe joıý múmkindigi bar ekenin atap ótti. Habarlamany alǵannan keıin ony oryndaýǵa 30 jumys kúni jáne shamamen 45 kúntizbelik kún beriledi.
«Eger siz sáıkessizdikpen kelisseńiz — qosymsha salyq eseptiligin tapsyryp, ózińiz eseptegen salyq somalaryn tóleńiz. Eger buzýshylyq joq dep esepteseńiz — negizdememen túsinikteme berińiz. Bul habarlamany oryndaýdyń balamaly tásili», — dep qosty salyq qyzmeti.
Habarlamanyń bar-joǵyn salyq tóleýshiniń jeke kabınetinde tekserip, ony oryndaýǵa bolady.