Qazaqstan azamatshasy erekshe iri mólsherde salyq tóleýden jaltarǵany úshin Reseı Federasıasynan ekstradısıalandy. Kúdikti sot tóreliginen jasyrynyp, halyqaralyq izdeý jarıalanǵan bolatyn, dep habarlaıdy infohub.kz saıty.
Bas prokýratýranyń málimetinshe, áıel komersıalyq uıym dırektory qyzmetin atqara júrip, 2022-2023 jyldary salyq deklarasıalaryna kirister týraly burmalanǵan málimetter engizgen, osylaısha 290 mıllıon teńgeden astam salyq tóleýden jaltarǵan.
Qylmys jasaǵannan keıin ol qylmystyq qýdalaý organdarynan jasyrynyp, halyqaralyq izdeý jarıalanǵan. Osy jyldyń qańtarynda ol Krasnodar qalasynda ustalyp, Qazaqstanǵa jetkizildi.
Qazirgi ýaqytta kúdikti tergeý ızolátoryna qamalǵan. Oǵan taǵylǵan aıyp boıynsha segiz jylǵa deıin bas bostandyǵynan aıyrý, sondaı-aq úsh jylǵa deıin belgili bir laýazymdardy atqarý nemese belgili bir qyzmetpen aınalysý quqyǵynan aıyrý jazasy qarastyrylǵan.