Semeıde probasıa qyzmetiniń esebinde turǵan azamat úshin dostarymen kezdesý bas bostandyǵynan aıyrýǵa ákeldi, dep habarlaıdy infohub.kz saıty.
Abaı oblysy boıynsha QAJD baspasóz qyzmetiniń málimetinshe, óńirdiń 34 jastaǵy turǵyny tústi metal buıymdaryn urlaǵany úshin sottalǵan. Sot oǵan úsh jyl alty aı merzimge bas bostandyǵyn shekteý jazasyn taǵaıyndaǵan.
Úkim shyqqannan keıin er adam Semeıdegi probasıa qyzmetiniń esebine qoıylǵan. Qyzmetkerler oǵan jazany óteý erejelerin, mindetterin túsindirip, buzǵany úshin jaýapkershilik týraly eskertken.
Osyǵan qaramastan, sottalǵan adam belgilengen talaptardy birneshe ret buzǵan. Tekserýler kezinde ol úıde bolmaǵan, al elektrondy baqylaý quralyn ádeıi zarádtamaǵan.
Júıeli túrde buzǵany úshin probasıa qyzmeti sotqa júgingen. Nátıjesinde sot oǵan bas bostandyǵyn shekteý jazasyn bas bostandyǵynan aıyrýmen almastyrǵan. Ótelmegen merzimi eki jyl bir aıdy quraǵan.
Sottalǵan adam ókinishin bildirdi: «Maǵan bostandyqta qalyp, túzelýge múmkindik berildi. Men jumys istep, adal jolmen tabys taýyp, jańa ómir bastaı alar edim. Densaýlyǵym jumys isteýge múmkindik beredi, biraq men basqa joldy tańdadym. Araqqa aqsha tabý úshin urlyq jasadym. Probasıa qyzmetiniń baqylaýynda júrsem de, dostarymmen kezdesip, ishýdi jalǵastyrdym. Saldary týraly oılamadym, bári ońalady dep sendim. Endi qateleskenimdi túsindim. İs-áreketterimniń saldarynan bostandyqta bolý múmkindiginen aıyryldym. Meniń otbasym, áıelim, balalarym joq, ata-anammen kópten beri aralaspaımyn. Qazir túsinemin: araq pen sol orta meniń ómirimdi ǵana buzdy. Dostarym meni qoldaıdy dep oıladym, biraq endi olarǵa meniń ómirim báribir ekenin túsindim. Naǵyz dostar maǵan toqtaýǵa kómektesip, problemalar men jaman áreketterden qorǵaýy kerek edi, biraq olar jaǵdaıdy odan saıyn ýshyqtyrdy. Ýaqytynda toqtaı almaǵanyma ózim kinálimin. İstegenime óte ókinemin, ýaqytty keri qaıtarǵym keledi».