Shymkenttegi kásiporynda elektr togy soǵyp, burynǵy sportshy Ádil Tilektes qaza tapty. Ajal qushqan jaıttyń mán-jaıyn oblystyq polısıa departamenti habarlady, dep jazady infohub.kz saıty.
Balýannyń qaza bolǵany týraly aqparat Halýqstan Telegram-arnasynda jarıalandy. Jazba avtorynyń dereginshe, Ádil Tilektes joǵary kerneýli kabeldi abaılamaı ustap qalyp, bıikten qulap, ómirmen úılespeıtin jaraqat alǵan.
«Sporttaǵy kóptegen jetistigine, sonyń ishinde 2019 jyly grek-rım kúresinen 60 kelige deıingi salmaq dárejesinde Qazaqstan chempıonatynda jeńiske jetkenine qaramastan, Ádil otbasyn asyraý úshin kásibı mansabyn aıaqtap, Shymkenttegi keramıkalyq plıtka shyǵaratyn zaýytqa jumysqa turýǵa májbúr boldy. Sportshynyń estý qabileti nashar edi. Ol jarystarda bar bolǵany eki jyl belsendi óner kórsetip, sodan keıin kilemnen ketti. Marqumnyń eki balasy qaldy», — delingen jarıalanymda.
Shymkent qalalyq polısıa departamentiniń baspasóz qyzmeti habarlaǵandaı, qaladaǵy kásiporyndardyń biriniń aýmaǵynda jumysshynyń qaza bolýyna qatysty sotqa deıingi tergeý júrgizilip jatyr.
«Aldyn ala anyqtalǵanyndaı, er adam jumys barysynda elektr togy soǵyp, ólimge ákep soqqan jaraqat alǵan. Qazir bolǵan oqıǵanyń barlyq mán-jaıyn anyqtaýǵa baǵyttalǵan qajetti tergeý áreketteri júrgizilýde», — dedi vedomstvoda.
Qazaqstan Respýblıkasy Qylmystyq is júrgizý kodeksiniń 201-babyna sáıkes tergeý múddesi úshin ózge málimetter jarıa etilmeıdi, dep qosty polısıada.