Shymkentte qala mektepteriniń jumysyn sıfrlyq taldaý barysynda satyp alýlarǵa, muǵalimderdiń oqý júktemesine jáne keıbir otbasylardyń mártebesine qatysty kúmándi derekter anyqtaldy, dep habarlaıdy infohub.kz saıty.
Qala mektepteriniń qyzmetindegi qyzyqty málimetterdi «Jetinshi arna» jarıalady. Anyqtalǵan buzýshylyqtardyń bir bóligi muǵalimderge qatysty: mysaly, 70 saǵattyq júktememen jumys istegen muǵalim, sondaı-aq bir qyzmetkerdiń bir mezgilde eki basshylyq laýazymdy atqarǵan jaǵdaılary tirkeldi.
Sıfrlyq taldaý kórsetkendeı, bir mektep búdjet qarajaty esebinen 70 balta satyp alǵan. Sonsha qural qandaı qajettilikke jumsalǵany belgisiz. Sonymen qatar úsh býhgalterge 55 kálkýlátor tapsyrylǵan.
Sondaı-aq áleýmettik kómek alatyn keıbir otbasylardyń ózderiniń dúkenderi, jer telimderi jáne birneshe kóligi bar ekeni anyqtaldy. Al ózin az qamtylǵan otbasy retinde kórsetkenderdiń bir bóligi kómek alýǵa quqyǵyn rastaıtyn qujattardy usyna almady.
Jalpy alǵanda, taldaý bilim salasynda birden 12 baǵyt boıynsha erejelerdiń saqtalmaǵanyn kórsetti.
«Sıfrlandyrý kóp kómektesti. Aıtqanymdaı, byltyr 10 mlrd 200 mln teńge únemdedik, búginde shamamen 15 mlrd teńge únemdedik. Jyl sońyna deıin únemdelgen qarajat kólemi odan da artady dep oılaımyn», — dedi Shymkent ákiminiń orynbasary Sársen Quranbek.