Shymkentte ákimshilik ister jónindegi sot alqasy turǵyn úı berý týraly isti qarap, taraptar sot medıasıasy tártibimen tatýlasty. Áıel «jetim balalar jáne ata-anasynyń qamqorlyǵynsyz qalǵan balalar» sanaty boıynsha kezekke qaıta qoıylady, dep habarlaıdy infohub.kz saıty.
Talap qoıýshy 2016 jyldan beri osy sanat boıynsha turǵyn úıge muqtaj retinde kezekte turǵan. Aksıonerlik qoǵam júrgizgen túgendeý barysynda talap qoıýshynyń jubaıynyń buryn jekeshelendirilgen páterde úlesi bolǵany anyqtaldy. Osyǵan baılanysty turǵyn úı berý rásimi toqtatylǵan.
Birinshi satydaǵy sot istiń mán-jaıyn jáne usynylǵan qujattardy jan-jaqty zerttedi. Keıinnen talap qoıýshynyń jubaıyna tıesili turǵyn úıdegi úles tolyǵymen ıelikten shyǵarylǵany belgili boldy. Sot aksıonerlik qoǵamnyń áreketterin zańsyz dep tanydy. Zańnamaǵa sáıkes jetim balalar turǵyn úıge muqtajdar tiziminen shyǵarylmaıdy, al turǵyn úı berý rásimin «toqtata turý» tártibi zańda kózdelmegen. Sot sheshimimen talap qoıý tolyq kólemde qanaǵattandyryldy.
Apelásıalyq shaǵymdy qaraý barysynda sot alqasy taraptardy tatýlastyrý jumystaryn júrgizdi. Nátıjesinde taraptar arasynda sot medıasıasy tártibimen kelisim jasaldy. Onyń sharttary boıynsha aksıonerlik qoǵam 10 jumys kúni ishinde turǵyn úı berý rásimin toqtatý týraly sheshimdi joıýǵa jáne talap qoıýshynyń burynǵy sharttarmen turǵyn úı baǵdarlamasyna odan ári qatysý quqyǵyn qalpyna keltirýge mindettendi.
Osylaısha, azamattyń buzylǵan quqyǵy daýdy beıbit jolmen retteý arqyly qalpyna keltirildi. Sot aktisi zańdy kúshine endi.