Shymkentte 40 jastaǵy kúres sheberi Vasılı Kolesnıkovty óltirýge qatysty rezonanstyq is boıynsha sot prosesi bastaldy. Ony qańtar aıynda jappaı tóbelesten keıin jol-kólik oqıǵasy bolǵan jerden urlap ketken edi, dep habarlaıdy infohub.kz saıty.
KTK telearnasynyń málimetinshe, qaıǵyly oqıǵa 20 qańtarda bolǵan. Sol kúni Shymkentte aldymen qarapaıym jol apaty tirkeldi: eki kólik soqtyǵysyp, júrgizýshiler máseleni anyqtaý úshin kólikten túsken. Alaıda kóp uzamaı apat ornyna bir top er adam kelip, janjal jappaı tóbeleske ulasyp, ol beınekameraǵa túsip qalǵan. Bir sátte qarsylastary Vasılıdi óz kólikterine ıterip mingizip, belgisiz baǵytqa alyp ketken. Qorǵaýshy tarap bul apattan keıingi kezdeısoq tóbeles emes, aldyn ala josparlanǵan torýyl bolǵanyn aıtady.
Urlaýdan keıin Kolesnıkovty birneshe saǵat izdegen. Keıin onyń denesi Shymkent qalasynyń mańynan tabylǵan. Tergeý derekteri boıynsha, denede qatigezdikpen jasalǵan azaptaý izderi bolǵan. Sot aldyna alty adam keldi, olardyń betterin kórsetýge tyıym salyndy. Taǵy eki kúdikti izdeý jarıalanǵan.
Memlekettik aıyptaýshy Muhtar Arystanov: «Erekshe qatygezdikpen Kolesnıkovqa birneshe ret qatty zatpen, sondaı-aq kesetin qasıeti bar ótkir zatpen soqqy jasaǵan. Keltirilgen dene jaraqattary onyń ólimine ákelýi múmkin ekenin bile tura, osyndaı saldardyń bolýyn qalap, olar ony ádeıi óltirgen», — dedi.
Eske salaıyq, qańtar aıynda Shymkenttegi jol apatynyń beınejazbasy áleýmettik jelide tarap, ol jappaı tóbeleske ulasyp, adam ólimine ákelgen edi. Eki kólik soqtyǵysqannan keıin janjalǵa úshinshi kólik te qosylǵany aıtylǵan. Nátıjesinde bir er adam kóptegen pyshaq jaraqatyn alsa, taǵy bireýin kúshpen qala syrtyna alyp ketip, keıin onyń denesi tabylǵan.
Keıin densaýlyq saqtaý basqarmasy qalalyq №1 klınıkalyq aýrýhanaǵa 1990 jyly týǵan naýqas aýyr jaǵdaıda jetkizilgenin habarlady. Oǵan sol jaq keýde qýysynyń tesilgen jaraqaty dıagnozy qoıylyp, shuǵyl hırýrgıalyq ota jasalǵan. Zardap shekken adam reanımasıaǵa jatqyzylǵan.
Sondaı-aq Shymkent polısıa departamenti kisi óltirý jáne buzaqylyq jasady degen kúdikke ilingen tórt er adamdy anyqtap, ustaǵanyn málimdedi. Keıin taǵy úsh kúdiktiniń ustalǵany habarlandy.