Shymkentte kólik polıseıleri ótip bara jatqan poıyzǵa tas laqtyrǵan jasóspirimderdi ustady. Kámeletke tolmaǵandar ata-analarymen birge bólimshege jetkizilip, olar balalaryn tıisti deńgeıde tárbıelemegeni úshin jaýapkershilikke tartyldy, dep habarlaıdy infohub.kz saıty.
Kóliktegi polısıa departamenti baspasóz qyzmetiniń málimetinshe, Saratov — Almaty baǵytyndaǵy jolaýshylar poıyzynda qoǵamdyq tártip pen qaýipsizdikti qamtamasyz etken Shymkent stansıasyndaǵy polısıa basqarmasynyń qyzmetkerleri óreskel quqyqbuzýshylyqtyń jolyn kesti. Vagon terezesinen olar temirjol boıynda turyp, poıyzǵa tas laqtyryp jatqan úsh jasóspirimdi baıqady.
Jaǵdaıdy jyldam baǵalaǵan tártip saqshylary poıyz mashınısine habarlasyp, jyldamdyqty báseńdetý týraly nusqaý berdi. Qabyldanǵan sharalardyń nátıjesinde úsh jasóspirim ustaldy. Keıin olar ata-analarymen birge Shymkent stansıasyndaǵy kólik polısıasy basqarmasyna jetkizildi. Zańdy ókilderiniń qatysýymen olar istegenderin moıyndady.
Jasóspirimdermen temirjol kóligi nysandarynda qaýipsiz júrý erejeleri týraly profılaktıkalyq áńgime júrgizildi, al olardyń ata-analary balalaryn tárbıeleý jónindegi mindetterin tıisti deńgeıde oryndamaǵany úshin jaýapkershilikke tartyldy.