Soltústik Qazaqstan oblysynda sharýa qojalyǵynyń basqarýshysy men jetekshisi arasyndaǵy jeke janjaldan týyndaǵan astyq qoımalaryn qasaqana órteý isine kasasıalyq sot núkte qoıdy. Órtten kelgen shyǵyn 495 mıllıon teńgeni qurady, dep habarlaıdy infohub.kz saıty.
«Kasasıalyq sottardyń ózekti jańalyqtary» Telegram-arnasynyń málimetinshe, sharýa qojalyǵynyń basqarýshysy 2023 jyldyń mamyrynda jetekshisine degen jeke óshpendiliginen basqa adammen birlesip, Soltústik Qazaqstan oblysyndaǵy astyq qoımalaryn órteýdi uıymdastyrǵan. Órt múlikti joıyp, sharýa qojalyǵyna 495 mıllıon teńge shyǵyn keltirildi.
Birinshi satydaǵy sot er adamdy órteý arqyly bóten múlikti qasaqana joıý jáne búldirý, erekshe iri shyǵyn keltirý (Qylmystyq kodekstiń 202-babynyń 3-bóligi, 2-tarmaǵy) boıynsha kináli dep tanyp, oǵan 6 jylǵa bas bostandyǵynan aıyrý jazasyn taǵaıyndady, sondaı-aq materıaldyq shyǵyndy óndirýge sheshim qabyldady. Apelásıalyq saty bul sheshimdi ózgerissiz qaldyrdy.
Sottalǵan adamnyń advokaty qorǵalýshysynyń kinásiniń dáleldenbegenin alǵa tartyp, úkim men apelásıalyq qaýlyny joıýdy surap, kasasıalyq shaǵym berdi.
Alaıda kasasıalyq sot basqarýshynyń órt qoıýdy uıymdastyrýdaǵy kinási zerttelgen dáleldemelerdiń jıyntyǵymen rastalady degen tujyrymǵa keldi. Olardyń qatarynda tótenshe jaǵdaılar organdarynyń materıaldary, oqıǵa ornyn tekserý hattamalary, órttiń bolǵanyn anyqtaǵan órt-tehnıkalyq zertteýlerdiń qorytyndylary, kináli adamdardyń telefon baılanystary týraly derekter, sondaı-aq jábirlenýshi men kýágerlerdiń jaýaptary bar. Keltirilgen shyǵynnyń mólsheri sot qurylys-ekonomıkalyq saraptamasymen rastaldy.
Sot taǵaıyndalǵan jazany jasalǵan qylmystyń aýyrlyǵyna jáne zań talaptaryna sáıkes dep tapty. Osyny eskere otyryp, qabyldanǵan sot aktilerin joıýǵa nemese ózgertýge negiz tabylmady.