Soltústik Qazaqstan oblysynyń turǵyndary úshin tabıǵat aıasyndaǵy demalys qaıǵyly jaǵdaıǵa aınala jazdady: Esil ózeninde balyq aýlap júrgen jubaılar oq astynda qaldy. Bul týraly Skolife_ Instagram paraqshasynda jarıalanǵan habarlamadan belgili boldy, dep jazady infohub.kz saıty.
Habarlama avtorlarynyń aıtýynsha, oqıǵa Qyzyljar aýdanyndaǵy Ivanovka aýylynyń mańynda bolǵan. Bir sátte jaqyn jerde atys bastaldy. Alǵashynda dybys alystan estilgen, alaıda kóp uzamaı oqtar adamdardyń dál basynan usha bastady.
Jarıalanym avtory birneshe oq odan shamamen 50 santımetr jerden ótkenin aıtty. Ol oqtardyń butalardy tesip ótip bara jatqanyn kórip, dereý jerge qulap, kúıeýine: «Atyp jatyr!» — dep aıqaılady. Er adamnyń basynan da oqtar ushqan.
Abyroı bolǵanda, atys kezinde eshkim zardap shekpedi. Jarıalanym avtorlary: eger bul aýdanda áskerı jattyǵýlar ótkizilip jatsa, nege adamdardy aldyn ala eskertpedi, nege eskertý belgileri men qorshaý qoıylmady? — dep suraq qoıady.
NUR.KZ tilshisi Soltústik Qazaqstan oblysy polısıa departamentiniń baspasóz qyzmetine saýal joldady. Onda balyq aýlaǵan jerdiń mańynan atys dybystary týraly jarıalanymǵa qatysty tekserý júrgizilgeni habarlandy.
«Jaqyn mańdaǵy áskerı nysanda josparly atys júrgizilgeni, bul týraly tıisti belgiler arqyly eskertilgeni anyqtaldy. Zardap shekkender joq. Polısıa eskertý belgileriniń talaptaryn saqtaýǵa jáne belgilengen qaýipsizdik sharalaryn ustanýǵa, atys júrgizilip jatqan aýmaqtarǵa jaqyndamaýǵa, ózińiz ben aınalańyzdaǵylardy qaýipke tikpeýge shaqyrady», — delingen saýalǵa berilgen jaýapta.