Soltústik Qazaqstan oblysynda polısıa qyzmetkerleri issapardan qaıtyp kele jatyp, Astana – Petropavlovsk tas jolynda qaýipti manevrlerdiń kýási boldy, dep habarlaıdy infohub.kz.
Soltústik Qazaqstan oblysy polısıa departamentindegilerdiń aıtýynsha, jol jabyny jóndelip jatqan ýchaskede qozǵalys eki baǵytta kezekpen bir jolaqpen uıymdastyrylǵan. Osyǵan baılanysty munda kólik aǵynynyń tyǵyzdyǵy erekshe joǵary.
Alaıda 35 jastaǵy «VAZ-2107» júrgizýshisi birneshe ret basyp ozýǵa tyrysyp, qarsy kele jatqan kólikterdi kenetten baǵytyn jáne jyldamdyǵyn ózgertýge májbúr etken.
Bul buzýshylyqty oblystyń shalǵaı aýdanynan issapardan qaıtyp kele jatqan polısıa departamenti apparatynyń qyzmetkerleri tirkedi. Bul týraly SQO PD tergeý basqarmasynyń podpolkovnıgi Raýshan Bakeeva aıtty. Onyń aıtýynsha, aqparat pen beınejazba dereý osy ýchaskege qyzmet kórsetetin patrúldik polısıa batalónynyń ekıpajyna berilgen.
Tártip saqshylary júrgizýshini ákimshilik jaýapkershilikke tartty. Avarıalyq jaǵdaı týǵyzý 10 AEK (43 250 teńge) mólsherinde aıyppul salýǵa ákep soǵady. Jyl ishinde qaıtalanǵan jaǵdaıda jaza retinde 6 aıǵa kólik júrgizý quqyǵynan aıyrý qarastyrylǵan.
Polıseımen áńgimelesý kezinde júrgizýshi joldaǵy óz áreketin bylaı túsindirdi.
«Jumystan keıin jaı ǵana sharshaǵan edim», — dedi er adam.