Soltústik Qazaqstan oblysynda júkti áıeldiń ólimi tergelýde. Ol shuǵyl gospıtalızasıadan keıin kóz jumdy. Týystarynyń aıtýynsha, qaıǵyly oqıǵa joldyń nasharlyǵynan bolǵan – jedel járdem kóligi buzylǵan jolmen bir jarym saǵattan astam júrgen. Osydan keıin bılik atalǵan jol ýchaskesin jóndeýge ýáde berdi, dep habarlaıdy infohub.kz.
Qaıǵyly oqıǵa Soltústik Qazaqstan oblysynyń Jambyl aýdanynda boldy. Týystarynyń aıtýynsha, 3 shilde kúni keshke 34 jastaǵy Darıma Sagdeevanyń (ol júktiliktiń sońǵy aılarynda bolǵan) jaǵdaıy kenetten nasharlaǵan. Áıel esin joǵaltqan, sodan keıin dárigerler shaqyrylǵan.
Marqumnyń kúıeýi Azamat Sagdeevtiń senimi boıynsha, áıelin aýrýhanaǵa tezirek jetkizse, qaıǵyly jaǵdaıdy boldyrmaýǵa bolar edi. «Túngi saǵat 12-de jedel járdemmen ony aýdandyq aýrýhanaǵa – Presnovkaǵa apardy. Men óz kóligimmen jedel járdemdi ertip júrdim. Júrgizýshi baıaý júrdi. Birneshe ret toqtadyq. Men nege sonsha baıaý kele jatqandaryńdy suradym. Ol áıelimniń árbir shuńqyrda aýyrsynýdan aıqaılaǵanyn aıtty. Aıymjan aýylynyń mańynda ekinshi jedel járdem – reanımobıl kútip turdy. Ári qaraı áıelimdi sonymen apardy. Buzylǵan jolmen 37 shaqyrymdy bir jarym saǵat júrdik. Aýrýhanaǵa jetkizdik. Biraq tańǵy saǵat tórtte áıelimdi qutqara almaǵandaryn aıtty», – dedi ol.
Onyń aıtýynsha, dárigerler tasymaldaý kezinde áıeldiń júregi eki ret toqtaǵanyn habarlaǵan. Ólimniń sebebi – jatyrdyń jarylýy jáne ishki qan ketý. Balany da qutqarý múmkin bolmady.
Marqumnyń ákesi Marat Rahmetovtiń aıtýynsha, Darıma onyń jalǵyz qalǵan balasy bolǵan. «Bul – meniń jalǵyz qyzym. Ulym bolǵan – ol qaıtys boldy. Sosyn áıelim óldi. Endi qyzymnan da aıyryldym. Darıma kúıeýimen qalada turatyn. Men jalǵyz qalǵan soń, olar aýylǵa kóship keldi. Úsh jyl boıy olarmen birge turdym. Qyzym munda muǵalim, oqý isiniń meńgerýshisi bolyp jumys istedi. Barlyǵy ony qurmetteıtin. Endi eki nemerem qaldy. Olarǵa áli bolǵan oqıǵany aıtqan joqpyz. Analary issaparda dep aıttyq», – dedi marqumnyń ákesi.
Qaıǵyly oqıǵadan keıin Soltústik Qazaqstan oblysy polısıa departamenti adam ólimi faktisi boıynsha qylmystyq is qozǵady. Qazir sotqa deıingi tergeý júrip jatyr, onyń qorytyndysy boıynsha prosesýaldyq sheshim qabyldanady.
Darıma Sagdeevanyń týystary obektıvti tergeýdi talap etip, tek dárigerlerdiń ǵana emes, naýqasty tasymaldaǵan joldyń da jaǵdaıyna baǵa berý kerek dep esepteıdi.
Joǵary rezonansty oqıǵadan keıin óńir bıligi Presnovka – Kaırankol avtomobıl jolyn jóndeýge basymdyqty qarjylandyrý bólinetinin málimdedi. Soltústik Qazaqstan oblysy ákiminiń orynbasary Nurlan Kenesovtyń habarlaýynsha, jumys úsh kezeńnen turady. «Qazir jumysty úsh kezeńmen júrgizemiz. Birinshi kezeń – Kaırankoldan Ýkraınskoe aýylyna deıin, ekinshisi – Ýkraınskoedan Blagoveshenkaǵa deıin, odan keıin Presnovkaǵa deıin. Birinshi kezeń boıynsha jobalyq-smetalyq qujattama daıyn, saraptama qorytyndysy alyndy. Jaqyn arada merdiger anyqtalyp, sodan keıin jumys bastalady», – dedi ol.
Sonymen qatar, Jambyl aýdanynyń turǵyndary áleýmettik jelilerde buzylǵan joldyń sýretteri men beınejazbalaryn jarıalaýdy jalǵastyrýda. Marqumnyń týystary sot-medısınalyq saraptamanyń nátıjesin kútýde, ol bir aı ishinde daıyn bolady.