Ákimshilik ister jónindegi kasasıalyq sot Qyzylordadaǵy jeke kómekshilerdiń eńbegine aqy tóleý tártibi týraly daýdy túıindedi: olardyń syıaqysyna 1,3 ekologıalyq koefısıent qoldanylatyn boldy. Bul týraly infohub.kz saıty habarlaıdy.
NUR.KZ agenttiginiń «Kasasıalyq sottardyń ózekti jańalyqtary» Telegram-arnasyna silteme jasaı otyryp habarlaýynsha, kasasıalyq saty tómengi sottardyń sheshimderin ózgerissiz qaldyrdy. Olarǵa sáıkes, Qyzylordanyń jumyspen qamtý jáne áleýmettik baǵdarlamalar bólimi úsh jeke kómekshiniń qyzmetine aqy tóleýdi qaıta esepteýge mindetti.
2022 jyldyń qańtarynan bastap talap qoıýshylar júrip-turýy qıyn birinshi toptaǵy múgedektigi bar adamdarǵa jeke kómekshi retinde qyzmet kórsetti. Jumys táýligine 8 saǵat, aıyna 240-tan 248 saǵatqa deıin, jyl boıy úzdiksiz júrgizildi, kómekshiler aı saıyn atqarylǵan jumysy úshin syıaqy alyp otyrdy. Sonymen qatar, olardyń tabysynan mindetti zeınetaqy jarnalary men mindetti áleýmettik medısınalyq saqtandyrý jarnalary ustalyp, aýdarylyp otyrdy.
Talap qoıýshylar ekologıalyq jaǵdaıy qolaısyz aımaqta turatyndyqtaryna baılanysty óz qyzmetterine aqy tóleýge 1,3 koefısıentin qoldanýdy surady. Alaıda jergilikti atqarýshy organ olardyń ótinishin qanaǵattandyrýdan bas tartty.
Birinshi jáne apelásıalyq satylardaǵy sottar talap qoıýshylardyń talaptaryn qanaǵattandyrdy. Jaýapker sot aktilerin joıýdy surap, kasasıalyq shaǵym berdi. Kasasıalyq sot tómengi sottardyń tujyrymdarymen kelisti.
Sot «Aral óńirindegi ekologıalyq apattan zardap shekken azamattardy áleýmettik qorǵaý týraly» Zańǵa sáıkes Qyzylorda ekologıalyq daǵdarys aımaǵyna jatatynyn atap ótti. Atalǵan Zańǵa sáıkes, osy aýmaqta turatyn halyqqa ekologıalyq jaǵdaıy qolaısyz aımaqta turýyna baılanysty eńbegine aqy tóleý kezinde 1,3 koefısıenti belgilenedi.
Kasasıalyq sot talap qoıýshylar men jergilikti atqarýshy organ arasyndaǵy qatynastar azamattyq-quqyqtyq shart negizinde resmı resimdelgenine qaramastan, is júzinde olardyń arasynda eńbek qatynastarynyń belgileri bolǵanyn anyqtady. Atap aıtqanda, jeke kómekshiler turaqty negizde belgilengen tártippen jumys atqardy, táýligine 8 saǵat qyzmet kórsetti, demalyssyz jumys istedi jáne aı saıyn kórsetilgen qyzmetteri úshin júıeli túrde syıaqy alyp otyrdy. Sonymen qatar, olardyń basqa jerde jumys isteý múmkindigi shekteldi.
Sot Qazaqstan Respýblıkasynyń Eńbek kodeksine sáıkes eńbek shartynyń negizgi belgileri jumysty jeke ózi atqarý, eńbek tártibine baǵyný jáne eńbegi úshin syıaqy alý bolyp tabylatynyn kórsetti. Atalǵan belgilerdiń bolýy taraptar arasyndaǵy qatynastardyń naqty sıpatyn aıqyndaý kezinde eskerilýge tıis.
Budan basqa, jeke kómekshiler úshin mindetti zeınetaqy jarnalary men mindetti áleýmettik medısınalyq saqtandyrý jarnalaryn esepteý jáne aýdarý olardyń eńbegine aqy tólengenin jáne eńbek qatynastarynyń bar ekenin rastaıtyn mán-jaı retinde baǵalandy.
Osyǵan baılanysty kasasıalyq sot 1,3 koefısıenti jeke kómekshilerge tólenetin kepildendirilgen somaǵa da qoldanylýǵa tıis degen qorytyndyǵa keldi.