Bala kezinde sportpen aınalysqan áıelderdiń bızneste basshylyq qyzmetke jetý yqtımaldyǵy joǵary, dep habarlaıdy infohub.kz.
People basylymynyń jazýynsha, e.l.f. Beauty kompanıasy Parity platformasymen birlesip, Power of Women's Sports Summit 2026 samıti aıasynda aýqymdy zertteý júrgizdi. Sarapshylar AQSh, Ulybrıtanıa, Kanada jáne Germanıadan 9,5 myńnan astam respondentpen suhbattasty. Nazarda mektep qabyrǵasynda keminde úsh jyl sportpen aınalysqan jáne mansabyn jalǵastyrǵan áıelder boldy.
Nátıjeler kórsetkendeı, mundaı qyzmetkerler sportqa qatysy joq áriptesterimen salystyrǵanda basshylyq laýazymdardy 50%-ǵa jıi ıelenedi. Sonymen qatar, buryn sportshy bolǵan áıelder joǵary ákimshilik qyzmetterge 37%-ǵa jıi umtylady jáne jalaqyny kóterý týraly kelissózderdi 25%-ǵa belsendi júrgizedi. Respondentterdiń shamamen 90%-y jattyǵýlarda alǵan daǵdylar olardyń mansaptyq ósýine tikeleı kómekteskenin rastady.
Esep avtorlarynyń atap ótýinshe, kásibı rekordtarǵa jetý emes, jarystar men komandalyq jumysqa qatysýdyń ózi sheshýshi ról atqarady. Fızıkalyq belsendilik qyzdardyń tártiptilik, kóshbasshylyq qasıetterin qalyptastyryp, stresske tózimdiligin arttyrady. Zertteýshiler alynǵan derekter qoǵamdy qyzdarǵa arnalǵan mektep sportyn belsendi qoldaýǵa jáne damytýǵa shabyttandyrady degen úmit bildirdi.