Shetelde bilim alyp jatqan qazaqstandyq stýdentter sheteldik shottary men aktıvteri bolsa, salyq deklarasıasyn tapsyrýǵa mindetti, dep habarlaıdy infohub.kz saıty.
Memlekettik kiris organdary sheteldik oqý oryndarynda bilim alyp jatqan qazaqstandyq stýdentterge jalpy deklarasıalaý máseleleri boıynsha túsinikteme jarıalady. 2025 jylǵa arnalǵan salyq eseptiligin tapsyrýdyń negizgi kezeńi 2026 jylǵy 15 qyrkúıekte aıaqtalady.
Bilim alý maqsatynda shetelde júrgen qazaqstandyqtar QR salyq rezıdenti mártebesin saqtaıdy. Olarda deklarasıa tapsyrý mindeti tek kelesi jaǵdaılardyń biri bolǵanda týyndaıdy: 2025 jylǵy 31 jeltoqsandaǵy jaǵdaı boıynsha sheteldik bank shottaryndaǵy jıyntyq qaldyq 1 000 AEK-ten (3,9 mln teńge) asatyn bolsa; el aýmaǵynan tys jerde tirkelgen múliktiń (jyljymaıtyn múlik, kólik, bıznestegi úles, baǵaly qaǵazdar, sıfrlyq aktıvter) bolýy; 20 myń AEK-ten (78,6 mln teńge) asatyn somaǵa iri mámileler jasaý.
2025 jylǵy 1 qańtardan bastap jalpy deklarasıalaýdyń halyqtyń keń toptaryna arnalǵan tórtinshi kezeńiniń kúshi joıyldy, bul stýdentterdiń kópshiligin negizgi eseptilikten bosatty. Sonymen qatar, 2026 jylǵy 1 qańtardan bastap kúshine engen jańa Salyq kodeksi sheteldik joǵary oqý oryndarynyń stıpendıalary men granttaryn tabys salyǵynan bosatty.
Vedomstvo sheteldik shottardy jasyrýdyń tıimsiz ekenin eskertedi, óıtkeni Qazaqstan halyqaralyq avtomatty almasý aıasynda qarjylyq málimetterdi turaqty túrde alyp otyrady. Deklarasıany belgilengen merzimde tapsyrmaý ákimshilik aıyppul salýǵa ákep soǵady, onyń mólsheri 15-ten 30 AEK-ke deıin. Qujattardy salyq tóleýshiniń kabıneti jáne banktik mobıldi qosymshalar arqyly onlaın rejımde tapsyrýǵa bolady.