Taraz qalasynyń №2 soty esirtki taratýshyǵa úkim shyǵardy. Ol psıhotroptyq zattardy jasyryn oryndar arqyly taratqany úshin kináli dep tanyldy. Ár «zakladka» úshin ol krıptovalúta ámıanyna 2 myń teńge alyp otyrǵan, dep habarlaıdy infohub.kz.
İs materıaldaryna sáıkes, 2025 jyldyń jeltoqsanynda er adam Telegram arqyly belgisiz kýratormen baılanysyp, esirtki taratýǵa kelisken. Ol jasyryn oryndardan býmalardy alyp, Taraz qalasynyń ár jerinde jańa jerlerge ornalastyryp júrgen.
2026 jyldyń aqpanynda er adam Almatydan quramynda α-PVP bar 37 zıp-paketten turatyn býmany alyp, Tarazǵa jetkizgen. Ol býmalardyń birin Shańyraq shaǵyn aýdanyndaǵy jasyryn orynǵa qoıǵannan keıin polısıa qyzmetkerleri ony ustady. Tintý kezinde odan 11,58 gram psıhotroptyq zat alyndy.
Qylmystyq kodekstiń 297-baby 3-bóliginiń sanksıasy múlikti tárkileýmen 7 jyldan 12 jylǵa deıin bas bostandyǵynan aıyrýdy kózdeıdi. Prokýror amnıstıa Zańyn eskere otyryp, er adamǵa 5 jyl 4 aı bas bostandyǵynan aıyrý jazasyn taǵaıyndaýdy surady.
«Sot er adamdy erekshe iri mólsherde psıhotroptyq zattardy ótkizý maqsatynda zańsyz satyp alý jáne saqtaý, aldyn ala kelisim boıynsha adamdar tobymen jasaǵany úshin kináli dep tanydy. Oǵan 7 jyl bas bostandyǵynan aıyrý jazasy taǵaıyndaldy. Amnıstıa Zańyn eskere otyryp, túpkilikti merzim 4 jyl 8 aıdy qurady», — dep habarlady sottyń baspasóz qyzmeti.
Úkim ázirge zańdy kúshine engen joq.
Buǵan deıin «Kýrsıv» Kókshetaýda zakladka taratýshy otbasynyń sottalǵanyn jazǵan bolatyn. Nebári alty kún aralyqpen 20 jastaǵy qyz ben onyń ákesine úkim shyǵaryldy. Qyzǵa naqty merzim taǵaıyndalsa, 30 býma sıntetıkalyq esirtkimen ustalǵan ákesine jazany óteýdi keıinge qaldyrý qoldanyldy.