Tarazda 1300 orynǵa arnalǵan zamanaýı saltanat saraıynyń qurylysy bastaldy. Bul — Memleket basshysy Qasym-Jomart Toqaevtyń óńirlerdegi áleýmettik jáne mádenı ınfraqurylymdy damytý jónindegi tapsyrmalarynyń arqasynda júzege asyp jatqan joba, dep habarlaıdy infohub.kz.
Bolashaq nysannyń irgetasyna kapsýla salý rásimi Balaýsa shaǵyn aýdanynda ótti. Jobanyń quny 18,5 mlrd teńgeni quraıdy. Keshenniń qurylysyna 5 gektar jer bólingen, al negizgi ǵımarattyń aýdany 13 myń sharshy metrdi quraıdy.
Jobada 1300 oryndyq kórermen zaly, baspasóz ortalyǵy, konferens-zaldar jáne shyǵarmashylyq úıirmelerge arnalǵan bólmeler qarastyrylǵan. Nysan zamanaýı jaryqtandyrý jáne dybys júıelerimen jabdyqtalady. Munda konsertter, teatrlandyrylǵan qoıylymdar, shyǵarmashylyq keshter, sondaı-aq respýblıkalyq jáne halyqaralyq deńgeıdegi mádenı is-sharalar ótkizý josparlanýda.
Jańa keshen balalar men jastardyń shyǵarmashylyq qabiletterin damytýǵa, shyǵarmashylyq ujymdardyń qyzmetine jáne jańa mádenı jobalardy júzege asyrýǵa qosymsha múmkindikter beredi. Saltanat saraıyn paıdalanýǵa berý 2028 jyldyń naýryzyna josparlanǵan.
Rásim barysynda Jambyl oblysynyń ákimi Erbol Qarashókeev jańa nysannyń Tarazdyń mádenı damýy úshin mańyzdylyǵyn atap ótti. «Memleket basshysy Qasym-Jomart Kemeluly Toqaev mádenıet pen ónerdi damytýǵa, halyqqa qolaıly jaǵdaı jasaýǵa jáne eldiń rýhanı áleýetin nyǵaıtýǵa erekshe mán beredi. Tarıhy eki myń jyldan astam Taraz úshin mádenıet pen óner árqashan mańyzdy oryn alǵan. Sondyqtan zamanaýı mádenı ınfraqurylymdy qalyptastyrý — mańyzdy mindetterdiń biri. Salynyp jatqan saltanat saraıy qalanyń mádenı ómirine jańa serpin berip qana qoımaı, onyń týrısik tartymdylyǵyn arttyrýǵa da yqpal etedi. Jambyl oblysynyń turǵyndary atynan elimizdiń Prezıdenti Qasym-Jomart Kemeluly Toqaevqa óńirdiń áleýmettik-mádenı damýyna kórsetken nazary men mańyzdy jobalardy qoldaǵany úshin shynaıy alǵysymdy bildiremin», — dedi Erbol Qarashókeev.
Sondaı-aq is-sharada Jambyl oblystyq máslıhatynyń tóraǵasy Abdaly Nuralıev pen Qazaqstan Respýblıkasynyń eńbek sińirgen qaıratkeri Asylhan Shúnirekov sóz sóıledi. Mádenıet qyzmetkerleriniń atynan sóılegen Asylhan Shúnirekov jańa nysan shyǵarmashylyq ujymdar men jas talanttardyń damýyna qosymsha múmkindikter ashatynyna senim bildirdi.
Jambyl oblysy ákimdiginde qazirgi ýaqytta Tarazdaǵy eń úlken konsert zaly 951 kórermenge arnalǵanyn atap ótti. Ǵımarat 1980 jyly salynyp, 2017 jyly qaıta jóndeýden ótken. Jańa saltanat saraıy iri mádenı is-sharalardy ótkizýge arnalǵan zamanaýı ári keńirek alańǵa aınalady.