Taraz qalalyq soty qarjy ortalyǵynyń memlekettik grant boıynsha oqyǵan túlekten oqý shyǵynyn óndirý týraly talabyn qanaǵattandyrmady. Sebebi jaýapkerde pedagogtyń kásibı mindetterin atqarýǵa kedergi keltiretin aýyr psıhıkalyq aýrý anyqtalǵan, dep habarlaıdy infohub.kz saıty.
Jambyl oblysy sottarynyń resmı Telegram-arnasynda málim bolǵandaı, Taraz qalalyq soty qarjy ortalyǵynyń jaýapkerge qoıǵan oqý shyǵynyn óndirý týraly azamattyq isin qarady.
2016 jyly jaýapker «Dene shynyqtyrý jáne sport» mamandyǵy boıynsha «Qazaq sport jáne týrızm akademıasy» AQ-ǵa bilim grantymen qabyldanǵan. Oqý barysynda respýblıkalyq búdjetten joǵary oqý ornynyń shotyna 1,7 mln teńge aýdarylǵan. 2020 jyly jaýapker oqýdy sátti aıaqtady.
Shart talaptary boıynsha jaýapker bilim berý uıymdarynda keminde 3 jyl jumys isteýi tıis edi. Talap qoıýshy sotqa júginip, jaýapkerdiń nebári 7 aı jumys istegenin kórsetip, oqý shyǵyny retinde 1,4 mln teńge jáne 1,1 mln teńge kóleminde ósimpul óndirýdi surady.
Sot jaýapkerde oqýdy bitirgennen keıin aýyr psıhıkalyq aýrý anyqtalǵanyn belgiledi. Ol birneshe ret emdelip, psıhıatrıalyq dıspanserlik esepte turǵan.
Sot jaýapkerdiń pedagogtyń kásibı mindetterin atqarýǵa kedergi bolatyn aýrýdyń paıda bolýyna jaýapty bola almaıdy degen qorytyndyǵa keldi.
Sot sheshimimen qarjy ortalyǵynyń talaby tolyǵymen qanaǵattandyrylmady. Sheshim zańdy kúshine engen joq.