Jambyl oblysynda er adamnyń qaıtys bolýyna baılanysty jańa mán-jaılar anyqtaldy. Tergeý derekteri boıynsha, ony urlap, aıaýsyz soqqyǵa jyqqan. Kúdiktige aıyp taǵylyp, onyń baılanystary tekserilýde, dep habarlaıdy infohub.kz.
Jambyl oblysy polısıa departamentiniń baspasóz qyzmetinen málim etkendeı, sotqa deıingi tergeý Qazaqstan Respýblıkasy Qylmystyq kodeksiniń eki baby boıynsha júrgizilýde: «Adamdy urlaý» jáne «Abaısyzda jábirlenýshiniń ólimine ákep soqqan aýyr dene jaraqatyn qasaqana keltirý».
«Kúdikti ýaqytsha ustaý ızolátoryna qamaldy. Basqa adamdardyń da bul oqıǵaǵa qatysy bar-joǵy anyqtalýda. Qazirgi ýaqytta istiń mán-jaıyn jan-jaqty, tolyq jáne obektıvti anyqtaýǵa baǵyttalǵan qajetti tergeý sharalary júrgizilýde. Tergeý barysy Jambyl oblysy polısıa departamenti basshylyǵynyń erekshe baqylaýynda», — dep atap ótti vedomstvoda.
Buǵan deıin qaıtys bolǵan adamnyń ápkesi aǵasynyń aýrýhanada jumys istegenin aıtqan. Onyń sózinshe, naýqastardyń biriniń burynǵy kúıeýi er adamǵa qońyraý shalyp, balaǵattap, aqyry kezdesýge shaqyrǵan. Áıeldiń aıtýynsha, sol jerde úsh jigit aǵasynyń basyna soqqy berip, kóliktiń bagajine salyp ketken. Keıin jábirlenýshini Asa ózeniniń jaǵasyna aparyp, aıaýsyz soqqyǵa jyqqan. Sodan soń ony óz kóligine salyp, aýrýhanaǵa aparyp, kósheden taýyp alǵandaryn aıtqan. Er adam esin jımaı qaıtys bolǵan.
Sondaı-aq ápkesi polısıa aldymen úsh kúdiktini ustaǵanyn, keıin ekeýin bosatqanyn habarlaǵan. Jambyl oblysy polısıa departamenti tergeý jalǵasyp jatqanyn rastady.