InfoHub Logo

Sahnaǵa múgedekter arbasyna tańylǵan eki jigit shyǵady. Ekeýi koláskalaryn qatarlastyra zalǵa qaratyp qoıyp, áńgimelese bastaıdy:

Baqyt:

- Ereke, ýaqyt ótsin! Áńgime aıtyńyz?​ Bul jerge qalaı kelip qaldyńyz...?

 Ermek:

- Sol úıde jata berip, ish pysqan soń, ádemi qyzdardyń qolynan em alaıyn - dep kelip qalǵan jáıim bar Báke!

Baqyt:

- Áp-bárekeldi! Jaraısyz Erekesi! Endi sulýlar sıpaǵan soń, shaýyp ketken shyǵarsyz?

Ermek:

-​ Shapqanda... eki aıaq kedergi keltire bergen soń alyp tastap, mynadaı sýper kólikpen shaýyp júrmin ǵoı.​ Bul jaryqtyqtyń bir qasıeti - benzın qajet etpeıdi, toq, gaz qoldanbaısyń. Kóbine óz qolyńmen ıterip júre beresiń nemese kimniń qoly bos, soǵan ıtertip qoıasyń. (Ekeýi qosyla kúledi)

Baqyt:

-​ Jaqynda mundaı arbanyń turyp júrýge de yńǵaıly túrleri shyǵypty. Transformer baldaq, ıa bolmasa mobıldi aıaq degen túrleri de bar eken!

Ermek:

-​ Zaman damydy degen osy! Ózińiz she baýyrym,​ bala-shaǵa bar ma?

Baqyt:

-​ Ázirge boıdaqpyn! Biraq aınalamda jaqsy qyzdar joq emes! Tipti "meni qashan alyp qashasyń?" - dep​ ázildeıtinderi de kóp. Bizdiń qazaqtyń qyzdary keremet qoı aǵa! Barlyǵy eńbekqor. Aqyldy, sulý, shydamdy.​ Buıyrtsa meniń de mańdaıyma jazylǵan bir qarakóz júrgen shyǵar?! Allanyń meıirimi sheksiz ǵoı!

Ermek:

- Durys aıtasyz! Keıde biz bolmaıtyn nársege bola qamyǵamyz. Negizi barlyǵy ózimizge baılanysty.​ Biz kúlip júrsek, ómir de bizge kúle qaraıdy.

Baqyt:

- Sol úshin men barlyq ýaqytymdy tutas josparlap, bir bóligin bilim-ǵylymǵa,​ ózimdi damytýǵa,​ bir bóligin qulshylyqqa, taǵy bir bóligin jumys istep, aqsha tabýǵa bólip tastadym!

Ermek:

-​ Bıznes trener emessiz be áıteýir?! Qazir qaptap ketti ǵoı​ bıznesmender.

Baqyt:

-​ Bıznes bizge qajet Ereke! Zaman talaby solaı bolyp tur qazir.

Ermek:

- E, boldy Báke! Ary qaraı toqtaı almaı qalasyz, eger bıznes trener bolsańyz....

Baqyt:

- (Kúledi) Jaqsy Ereke! Onda siz ózińiz jaıly aıtsańyz...? Qalaı myna kólikke ıe bolǵanyńyz jaıly... Qandaı maıdanǵa qatystyńyz...?
Ermek: (Kúledi)

​Men oıyn-saýyq maıdanynyń ardagerimin! Oıyn-saýyqty abaılamasa, sońy osylaı aıaqtalady eken ǵoı?! Jaraıdy.... bárin basynan baıandaıyn! (Sál oılanyp qalady. Baıaý mýzyka qosylady) Myna jalǵan óte qyzyq á negizi...?! Synaq pen suraqqa toly...​ Keıde erkeletedi...​ Keıde ókpeletedi... Júgiresiń, súrinesiń,​ qulaısyń,​ qaıta turasyń..!​ (Oılanyp ketedi)​ Qoı, ishińizdi pystyrmaı, oqıǵamdy baıandaıyn!

Baqyt:

- Qulaǵym sizde, Ereke!​ Bastaı berińiz....

Ermek:

-​ Men bir úıdiń erke, eshkim betinen qaqpaǵan jalǵyz ulymyn! Eshqashan "joq", "bolmaıdy" - degendi estirtpeı ósirdi marqum anam. Ákem momyn kisi bolatyn.​ Sheshemnen asa almady.​ Adam boıyna jelik bir kirmesin deńiz?​ Eger boıyńdy tákapparlyq pen ózimshildikke bir bılettiń be? Boldy.​ Ómir boıy arpalysyp ótkeniń ıt minezińmen. Qaıta bastadym ba...?

Jaraıdy.​ Óstim. Ózimshil, qyzǵanshaq, tákappar boldym.​ Aıaýshylyq, meıirim degen qasıetterdi álsizdikke sanap, qatal da qytymyr boldym. Úılendim. Uldy,​ sońynan qyzdy boldym.​ Jaqsy jerde jumys istedim. Áıelime ótirik aıtyp,​ kúnara qydyryp ketemin.​ Dostar. İshimdik.​ Qyzdar. Taýsylmaıtyn qyzyq!​ Bitpeıtin baqyt.​ Osynshama kóńildi orta, maǵan myna ómirde qaıǵy-qasiret baryn da umyttyryp jibergen edi.... Biraq​ taýsylmaıtyn nárse bolýshy ma edi...? Bul kúnder de aıaqtaldy...!

Sol kúni asa kóńildi boldym.​ Keshke jumysta Balmaskarad. Erteń - Jańa jyl. Bazarǵa barý kerek degendeı... jumystan suranyp,​ asyǵyp kele​ jatsam, aldymnan Úsen shyqty.

-​ Ereke, bilesiz Aıgúl ápkeniń múgedek balasyna otaǵa jylý jınap jatyrmyz! Árkim shamasy jetkenshe qol ushyn berip jatyr.​ Qansha bere alasyz? - dedi.

- Eı, osy seniń basqa isteıtin tirligiń joq pa? Nege únemi qaıyr-sadaqa surap júresiń? - dedim ashýlanyp.

- Ereke, sadaqa adamdy jetpis túrli báleden saqtaıdy​ - degen hadıs bar. Bireýler 200 teńge berip jatyr.​ Oǵan da raqmet! Olarǵa osy aqshasy kemi on ese bop qaıtady! Al, siz ózińiz bilińiz! Tek ashýlanbańyz... Erteń sizge sadaqa jınap qalmasymyzǵa kim kepil?​ Dúnıe - kezek! - dedi.

-​ Eı, ne aıtyp tursyń sen? A! Osy sózińe​ eregiskende bir tıyn da bermeımin! - dep,​ shyǵyp kettim...​ Keshke korporatıvtik kesh boldy. Jumystaǵy barlyq qyz-kelinshektermen jabysa da, jarysa bılep, ábden İshimdikke toıyp, tún ortasynan aýa úıge qaıttym....​ Jolda.. rúlde otyryp uıyqtap ketippin!​ Esimdi jıǵanda aıdalada,​ bir betonǵa soǵylyp, aıaǵym qysylyp jatyr ekenmin.... Eger bireýler kelip qutqarmasa, ózim shyǵa almasym anyq edi! Sýyqtan,​ qatty janshylǵan aıaqtyń aýyrǵanynan, qaıta talyp qalyppyn...!

Baqyt:

-​ Qıyn bolǵan eken...? Qalaı aman qaldyńyz?

Ermek:

- Áıelim polısıaǵa habar berip, eriktiler qosyla izdesip,​ zorǵa taýyp alypty. Zırat qorshaýyna baryp soǵylǵan ekenmin. Esimdi aýrýhanada jıdym. Tizeden tómen alyp tastapty....​ ​ Aıqaıladym.​ Jyladym. Bárin kináladym... sońynda túsindim...! Ózim ǵana kináli ekenmin...​ Meniń dos dep júrgen tanystarym, aýrýhanaǵa kelmek túgili, hal-surasýǵa da jaramady....​ Esesine Úsen, álgi jigit... kúnige keletin boldy...! Tipti myna arbany da sonyń tanystary alyp berdi...! Meniń ol jaıly, Alla jaıly pikirim 180 gradýsqa ózgerdi. Ómirimde alǵash ret ýaǵyzdy da aýrýhanada jatyp tyńdadym...​ Eki aıaǵym saý kezinde meshitke baryp, eki rákaǵat namaz oqymaǵanyma qatty ókinemin...! Men qandaı kórsoqyr bolǵanmyn... (daýsy dirildep, kózin súrtedi). Aınalamda jaqsy adamdar az bolmapty.​ Tek ózim eshqaısysyn baǵalamappyn...?! Tákapparlyq meni, ımansyz ortanyń beldi múshesine aınaldyrypty....

Baqyt:

- Ereke, Alla tek súıgen quldaryna ǵana aýyr synaqtar jiberedi.....! Demek, sizdiń de bir jaqsy qasıetińiz bolýy kerek?​ Múmkin emes sonshalyqty jaman adam bolýyńyz?​ Aıtyńyzshy...?! Qandaı jaqsylyq jasap edińiz..?

Ermek:

- Bilmedim... balalarymdy jaqsy kórdim... Sosyn... ıtimdi...​ Aıtpaqshy,​ bireýler bir ıtti aǵashqa baılap ketken eken. Ólgeli jatqan jerinen taýyp alyp, asyrap alǵanmyn. Sol bolmasa... Anam syrtymnan kóp duǵa jasaıtyn.​ Bálkim sonyń sharapaty shyǵar...? Bilmedim...?

Baqyt:

- Dese de,​ Allanyń meıirimi sheksiz! Qalǵan ómirińizdi týralyqpen ótkizseńiz,​ Jánnattyń da aýyly alys emes - dep oılaımyn. Moıymańyz!

Ermek:

- Ózińiz she..? Ózińiz qalaı otyryp qaldyńyz arbaǵa..?

Baqyt:

- Men ishten osylaı týylyppyn Ereke! Biraq esh moıyǵan emespin! Qaıta ómir men úshin óte qyzyq! Allah meniń bir múshemdi kem qylyp synaǵanymen, basqa múshelerimdi saý qylyp berdi emes pe?! Meniń ár kúnim josparly! Bos ýaqytym múldem az. Tańerteń tań namazyna turamyn, sodan keshke deıin tynym joq! Quran, hadıs​ jattaımyn, bıznespen aınalysamyn,​ aınalama kómektesemin, qaıyrymdylyq qoryna múshemin! Ózim sekildi adamdarǵa jiger, kúsh-qaırat berip, ómirge qaıta ǵashyq etýge tyrysamyn! Kóp qaıǵyratyn, ózińiz sekildi aýrýhanaǵa jańa túsken adamdarǵa demeý, qoldaý bildiremin! Jaqynda psıhologıalyq ortalyq ashsam dep júrmin! Bilesiz be, Ereke? Biz qoǵamǵa qajetpiz?! Siz oılamańyz endi eshkimge qajet emespin - dep! Ózińizdiń jan-dúnıeńizge qaıta bir úńilińiz...?! Eger siz myqty bolmasańyz,​ Alla sizdi bulaı synamaǵan bolar edi?! Demek, siz bul synaqty jeńe alasyz! Meniń qasyma seriktes bolyńyz?​ Ómirden túńilgen adamdarǵa,​ balasynan qashqan analarǵa, nashaqor bolǵan jastarǵa,​ zınaqor qyz-jigitterge kómek bereıik aǵa..?! Siz qoǵamǵa qajetsiz! Múgedek bolý - kúresker bolý! Erjúrek adamdardyń ǵana mańdaıyna jazylǵan synaq bul! Ári - baq! Endeshe biz sekildi alyp azamattardyń qolynan ne keletinin qoǵamǵa kórseteıik..?! Jylaǵanǵa - jubanysh, súringenge - súıenish bolaıyq!

Ermek:

-​ Baýyrym! Siz ne degen jaqsy sózder aıttyńyz?! Men nege osy ýaqytqa sheıin osylaı oılamaǵanmyn..?! Esime endi túsip otyr. Alash zıalysy Álıhan Bókeıhanov atamyz: "Tiri bolsam qazaqqa qyzmet etpeı qoımaımyn!"- demep pe edi...? Endeshe, keýdemde janym bola tura, er basymmen nege sonsha ezilgem...? Saý kezimde jylatqan, qulatqan adamdarǵa, nege qazir kómek bermeske...?​ Álbette,​ men qýana kelisemin!​ Men ózgeremin... tek (muńaıyp) osy ózgeris úshin​ mindetti túrde osy jaǵdaıǵa túsýim qajet pe edi...?! Eh, ómir-aı!

Baqyt:

- Ereke, eshten - kesh jaqsy! Bári jaqsy bolady!​ Júrińiz,​ em-dom alatyn ýaqyt boldy!
(Ekeýi sahnadan ketedi.​ "Men qazaqpyn" áni qoıylady. Sahnaǵa dáriger áıel shyǵady. Qasynda Júzbaı aǵa bolady.)

Dáriger:

- Aǵa, taǵy eki áıel balalarynan bas tartyp jatyr.​ Sóılesip kóresiz be? (Kúrsinedi.)

- Jaqsy aınalaıyn! Bul meniń jumysym ǵoı!​ Sóıleseıin.

-​ Aǵa, bul ár qazaqtyń jumysy bolǵanda ǵana, biz osy jamandyqtan qutylatyn shyǵarmyz?! Sizge alǵysymyz sheksiz!​ Osynda bir-birlep analardy jibereıin. Sáttilik tileımin....!

(Dáriger ketedi. Sahnaǵa jas kelinshek shyǵady. Yńǵaısyzdanyp...​ baıaý jaqyndaıdy.)

- Sálemetsiz be!​ Meni dáriger jibergen edi... Ne úshin shaqyrdyńyz?​ Kimsiz...?

- Sálemetsiń be qaryndasym! Men "Mıras-A" qoǵamdyq-qaıyrymdylyq qorynyń basshysy Júzbaı Serikuly aǵań bolamyn.​ Óziń sekildi qıyndyqqa ushyrap, kómekke muqtaj bolǵan jandarǵa qaraılasyp kelemin!​ Aınalaıyn qaryndasym, ómir boıy ózegiń órtenip,​ barmaǵyńdy shaınap ótetin qatelik jasamaýyńdy ótinemin?! Ia, sen qazir qınalyp,​ qorqyp,​ ne isterińdi bilmeı tursyń?​ Qoryqpa! Men de seniń bir aǵańmyn! Bir jylǵa sheıin páter jaldap,​ azyq-túlik pen úkimet tarapynan beriletin baspana, jumys sekildi basqa muqtajdyqtaryńa kómektesip turaıyn..? Náresteńdi tastamashy qaraǵym...?! Allanyń qaharynan qoryqsań deımin...?!
(Osy kezde únsiz jylap turǵan qyz, óz ýájin aıta bastaıdy. )

-​ Nemene...? Alladan qorq - deısiz be? Aǵa, nege osy sizder tek áıelderge ǵana basý aıtasyzdar? Qyzdarǵa ǵana qatal qaraısyzdar? Jigitterge nege eshkim eshnárse aıtpaıdy osy? Ańǵaldyǵyń men appaq senimińe túkirip ketetin,​ arly, taza qyzdardy mazaq etetin,​ jigitsymaqtarǵa nege eshnárse aıtpaısyzdar...?

-​ Qaryndasym,​ ýaıymdama! Jigitiń eshqaıda qashpaıdy! Áli aldyńa tizerlep kelip keshirim suraıtyn bolady...! Bastysy qazir baladan aırylyp qalmaýymyz kerek?! Túsinesiń be..? Sosyn, jigitiń aty-jónin, telefonyn, ol jaıly barlyq aqparatty jazyp ber ǵoı?! Ol da adasyp, qate túsiniktiń shyrmaýynda júrgen bolsa, bas tartpas! Aram oıly pasyq bolsa, táýbesine túsireıik...?! Ne deısiń...?

- Bilmeımin aǵa? Men qorqamyn! Ákem óte qatal adam! Meniń myna isimdi kórse, tirideı kómedi meni... Balama baýyr baspaı turyp, erterek náresteler úıine ótkizgenim durys bolady...! Aǵa, sizge kóp raqmet!​ Biraq​ men olaı isteı almaımyn....! Keshirińizshi....
(Jylap, tez-tez basyp shyǵyp ketedi. Júzbaı aǵa mańdaıyn qysyp, qatty qaıǵyryp otyryp qalady. Qaltasynan betoramalyn alyp, kózin súrtedi. Sahnaǵaosy kezde ekinshi áıel shyǵady.)

- Sálemetsiz be!​ Meni siz shaqyrdyńyz ba? Meni qaıdan tanısyz...?

Júzbaı aǵa muńaıyp:

- Sálemetsiń be aınalaıyn! Men seni múldem tanymaımyn!​ Sen de meni tanymaısyń! Men tiri jetimekterdiń qorǵaýshy perishtesi bolǵysy keletin, bir qazaqpyn! Men - naǵyz aǵamyn! Bálkim bolashaqta "mıllıondardyń ákesi"- degen ataýmen tarıhta qalarmyn... Biraq qazir qupıa jaqsylyq jasaýshy, aqyretine saýap jınaýshy musylmanmyn...! Menen uıalmasań da bolady.​ Óıtkeni seniń júzińdi kóre almaımyn! Qulaǵyma tek beıbit ómirde zar jylaǵan áıelderdiń daýsy ǵana estiledi...! Bárine aǵa, áke, qamqorshy bolǵym keledi...! Taıaǵymmen túrtinektep, qalanyń ana basynan, sender máńgilik ókinishke qalmasynshy... bir bala bolsa da ana meıiriminen ajyramasynshy-dep kelip otyrmyn. Bir jyl óz qamqorlyǵyma alaıyn, bas tarta kórmeshi balańnan....! Aınalaıyn qaryndasym,​ jalynaıyn... tastamashy náresteńdi....?! (Jylap qalady. Áıel de jylaıdy.)

- Aǵa, elim degen júregińizden aınaldym...! Bar ekensiz ǵoı...? Bar eken ǵoı azamattar!​ E Allahym, keshire gór? Kúlli erlerdi qaralaǵanym úshin?! Aǵa, siz de keshirińizshi meni...? Men beıbaq qaı jetiskennen balamdy jetimder úıine bergeli otyr deısiz...? Úıde ash bes balam bar. Kúıeýim ishimdikke salynyp, qańǵyp ketti.​ Saqtanyp júrsem de, Jaratqan Iem taǵy bir sharanany syılady.​ Abort jasatýǵa qımadym... qolym barmady. Odan da bir balasyz ana baǵyp alsa dep oıladym. Kúnige jylaı berip, sútim de shyqpaı qaldy...​ Úıde bir tistem nan da qalmady. Týystarym men kórshilerim ara-tura kómek berip turady.​ Járdemaqy páteraqydan​ artylmaıdy...! Aǵa, men sábıimdi qımaımyn... (Jylaıdy) Eger kómek berseńizder... men qýana qabyl alamyn! Beseýiniń jolyna bireýin qurban etemin de... dep keýdem qars aırylyp otyr edim...! Alla ne degen meıirimdi!​ Ne degen Ulyq! Sizdi jiberipti.... Alǵysym sheksiz!​ Eki dúnıede muńsyz bolyńyz aǵa!

-​ Aınalaıyn,​ sen de​ meni keshir! Jańa bir kelinshek sózimdi aıaq asty qylyp...​ tyńdamaı ketken soń, ashýlanyp otyryp qatty aıtyp jiberdim be?

- Aǵa! Ursa berińiz!​ Endi meniń aǵam bar! Sizdiń maǵan ókpeleýge haqyńyz bar! Ursýǵa da, renjýge de...! (Kúledi)

- Jaqsy, onda qaraǵym! Qudaı renishten saqtasyn! Seni ózim kelip shyǵaryp alamyn! Daıyndala bere ǵoı!

- Taǵy da​ myń alǵys aıtamyn sizge, aǵa! Jaqsy,​ saý bolyńyz!

(Kelinshek ketedi. Sahnanyń ana basynan arbadaǵy jigitter shyǵady. Tolqyp, kóz jasyn súrtip otyrǵan Júzbaı aǵanyń qasyna kelip,​ sálem beredi.)

Baqyt:

- Assalaýmaǵalaıkým Júzbaı aǵa! Sizdi birden tanydym. Iýtýbtan suhbattaryńyzdy kórgem.

- Ýaǵalaıkýmassalam baýyrym! Alla razy bolsyn!​ Ózderiń kim bolasyńdar?

- Aǵa, bizder arbadaǵy baýyrlaryńyz bolamyz! Meniń esimim - Baqyt.​ Myna kisi - Ermek degen inińiz bolady.

- Óte qýanyshtymyn Baqyt inim. Raqmet.

- Aǵa, biz arbada otyrǵanymyz bolmasa, tepse temir úzetin azamattarmyz! Men ózim aınaladaǵy ózim sekildi azamattarǵa jiger berip,​ ómirge qushtarlandyryp júrgen jigitpin.​ Bolashaqta osy baǵytta úlken ister atqarǵym keledi. Biraq neden bastarymdy bilmeımin. Sizdi tegin kezdestirmegen bolarmyz! Bizge qandaı aqyl aıta alasyz?

- Bireýi kúldirip,​ bireýi jubatqan qaıran qazaǵym-aı! Aınalaıyn Baqyt,​ Ermek. Myna qazaqtyń azamattary óz qaryndastaryn ábden qorlap bitti...! Jesirler men jetimder qaptap ketti...! Biz sekildi tekti ultqa, uıat nárse bul! Osy jaǵyn qolǵa alsaq?! Qazaq jastaryna zınaqorlyqtyń zardabyn túsindiretin,​ osy jıirkenishti istiń aldyn alatyn uıym qurǵym keledi.​ Sosyn kókek ákeler men jaýapsyz kúıeýlerdi jónge salatyn, ajyraǵan otbasylardy jarastyratyn ujymdardy kóbeıtsek? Elimizdiń eńsesin tiktep, esin jıýyna atsalysýǵa qalaı qaraısyńdar?

Ermek:

- O aǵa! Keremet ıdeıa ǵoı mynaý? Sonda... biz ne isteýimiz qajet?

Júzbaı aǵa:

- Men ázirge osy jobalardyń josparyn bir naqtylap shyǵaıyn!​ Telefon nomerlerimizdi almasaıyq!​ Qalǵanyn aldaǵy kúnniń enshisine qaldyraıyq?​ Ne deısińder?

Baqyt:

- Boldy Aǵa! Biz baılanystamyz! Bizde de ıdeıa kóp! Eń bastysy kókiregimiz soqyr, janymyz múgedek bolmasyn! Elge qyzmet etý - erlerdiń paryzy ǵoı!

Júzbaı aǵa:

- Rasynda qatty qýanyp turmyn jigitter!​ (Osy kezde telefony shyryldaıdy)

- Alo? Ia men! Kim? Jaqsy jańalyq qoı mynaý! Qashan baraıyn?​ Maqul! (Telefonyn qaltasyna salady)
Jigitter! Qazir ǵana qýanyshty jańalyq estidim! Múmkindigi shekteýli azamattardyń arasynan da depýtattyqqa saılaýǵa kandıdattar iriktemekshi eken! Soǵan bireýler syrtymnan meni usynypty! Qoldaısyńdar ma?

Baqyt:

- Álbette aǵa! O ne degenińiz?

Ermek:

- Qutty bolsyn aǵa! Biz sizge shynymen senemiz!​ Qatysyńyz!​ Siz ótesiz! Qazir halyqtyń kózi ashyq! Qoǵamǵa dál siz sekildi janashyr da meıirimdi adamdar aýadaı qajet! Qoldaımyz!

Baqyt:

- Aǵa, aıtpaqshy janarynan aırylǵan, kózi kórmeıtin zaǵıp jandarǵa arnalǵan "Táýelsiz, erkin, ómir súrý ortalyǵyn" saldyrsam - dep júr edińiz...? Sol jaǵy qalaı bolyp jatyr...?

Júzbaı aǵa:

- E, aınalaıyn baýyrym!​ Ol meniń kókeıimnen kúndiz-túni ketpeıtin eń asyl armanym ǵoı!​ Bir Astana qalasynyń ózinde eki myńǵa jýyq zaǵıp adamdar turady eken! Ol kisilerdiń basty problemalary - ózderi kir jýyp, útiktep, tamaq jasap t.t. maıda-shúıde jumystaryn atqara almaıdy! Osyndaı kisilerdi bir ortalyqqa jınap, kómek kórsetip, túrli sheberhanalar ashyp, ómirge degen qushtarlyqtaryn oıatsam! - degen edim.​ Adamnyń adamı qundylyǵy​ - bir-birlerin tiri kezderinde baǵalap, bir-birlerine kómek kórsetip, yntymaqtasa otyryp birlikpen is atqarýlarynda ǵoı?! Kezinde ata-babalarymyz qanshama halyqqa pana bolyp, ómirge beıimdep, dastarhanyndaǵy sońǵy nandaryn bólip berdi! Osy jaqsylyq endi urpaǵynyń aldynan shyǵyp, qazaq eli qanshama halyqtyń alǵysy men qoldaýyna bólenip otyr! Biz de judyryqtaı jumylyp, bir kisideı úlken saýapty is atqarsaq, Qıamet Kúni Allanyń aldynda júzimiz jaryq bolar ma edi​ - dep oılaımyn!​ Bir jyldyń ishinde ol jerge irgetasy qalanyp,​ qurylysy bastalmasa, sol zaǵıptarǵa arnalǵan eki gektar jer telimi qaıta ókimetke ótip ketý qaýpi bar! Soǵan shyryldap júrmin ǵoı inishekter...?!

Ermek:

- Óte saýapty is bastapsyz aǵa! Meniń biraz tanystarym bar! Sol kisilerge tanystyratyn jobanyń úlgisi bar ma?

Júzbaı aǵa:

- Jobanyń syzylǵan úlgisi mine! Proekt daıyn! Ol jerde zaǵıp jandarǵa barlyq jaǵdaı jasalsa! - dep otyrmyn.​ Sheberhanalardan bólek asqana, meıramhana, baseın,​ trenajórnyı zaldar, kınoteatr,​ kitaphana, avtomologıasy t.t. adamǵa qajetti barlyq jaǵdaılar jasalsa! Qarttar úıi, jetimder úıi, múgedekter úıleri bar ǵoı elimizde!​ Biraq jalǵyz qalǵan zaǵıptardyń jaǵdaıy nashar bolyp tur qazir!​ Ol kisilerge ek-úsh ese artyq kómek qajet. Osyǵan ınvestorlar tartsaq shirkin?!

Baqyt:
​

- Ia... aǵa! "Elim"- degen erlerdiń muraty ózgeshe bolatynyn taǵy bir dáleldep berdińiz! Men osy jobaǵa ınvestr izdep kóreıin!​ Jobańyzdy telebaǵdarlamarǵa kiristirip, halyqqa úndeý tastaıyq?

Ermek:

- Rasynda aǵa, ózimizde mundaı problema bolmaǵannan keıin,​ bul kisilerdiń jaǵdaıyn múldem oılamaıdy ekenbiz ǵoı?!

Júzbaı aǵa:

- Raqmet jigitter! Alla isimizge bereke berip,​ elge adal qyzmet etýdi jazsyn!​ Osyǵan deıin ózim Mıras - A qaıyrymdylyq qorynyń aıasynda "Shańyraq" tanysý buryshyn júrgizdim. Ajyrasyp ketken 54 otbasyn qaıta tabystyrdym!​ 108 adamnyń baqytyn taýyp, nekege turýlaryna sebepker boldym! Osy saýapty is mynadaı keremet ortalyqta jalǵasyn tapsa shirkin! - dep oılap júrmin. "Adal jar" jobasy boıynsha el kózinshe tanysyp, úı bolatyn jubaılardyń jaǵdaıyn da oılasaq! El - aman, jurt - tynysh bolsyn, aýmın!​

(Osy kezde balasyn tastap ketken kelinshek, sahnaǵa júgirip shyǵady)

- Aǵa! Sizdi endi taba almaımyn ba dep oılap edim.... úlgerdim - aý?! Men oılandym aǵa! Tek... bir​ shartym bar. Maǵan ata-anama "kúıeýim" - dep tanystyratyn, bir jigit taýyp berińizshi...? Ótinish sizden..?! (Jigitter bir-birlerine qarap, ne aıtarlaryn bilmeı turady) Maǵan úılenbeıdi.​ Tek spektákl oınasa boldy.

Baqyt:

- Eger ol spektáklge men sıaqty múgedek jigit jarasa, men shynymen-aq sizge kúıeý bolýǵa daıynmyn... (yńǵaısyzdana basyn qasıdy. Qyz jigitke bastan-aıaq qarap):

- Múgedek bolsańyz ne bopty...?! Bastysy jan-dúnıeńiz, oıyńyz múgedek bolmasa boldy? Jarap tursyz!​ Meniń ákem adamdy isine qarap baǵalaıtyn adam! Beti jyltyr,​ sózi taıǵaq jigitterdiń talaıyn qýyp jibergen! Múgedek bolsa da, arly azamatqa jar bol - dep otyratyn.​

Baqyt:

-​ Mine qyzyq!​ Onda meniń jolym bolatyn sekildi...!​

Kelinshek:

-​ Al ulym she...? Siz ony qabyldaı alasyz ba?​

Baqyt:

-​ Sábı súıý, áke bolý - bireýler úshin úırenshikti jaǵdaı shyǵar! Men úshin uly murat! Tipti bolashaqta kóptegen jetimderdi asyrap alǵym keledi...! Qandaı keremet,​ úıiń ýlap-shýlap jatsa! Men ondaı qýanyshqa uıyqtamaı qarap otyrar edim...!

Kelinshek: (Kóz jasyn súrtip)

-​ Allah razy bolsyn sizge!​ Siz de osy aýrýhana jatyrsyz ba? Onda bolashaq ulyńyzben tanystyramyn! Meniń esimim​ - Ásem. Bir saǵattan soń bizdiń qabatqa kóterilińiz. Mǵn sizdi dálizde kútemin!​ Aǵa kóp raqmet sizge! Men qaıtaıyn! Balam jylap jatqan bolar...​ (ketip qalady)

Júzbaı aǵa:

-​ Áıelder-aı, áıáılar-aı, qýlar-aı! Arystaı azamattardy mort syndyryp jylata salý da, bir sátte baqytty qylyp, qýanta salý da - senderge túk te emes-aý!

Ermek:

-​ Mássaǵan!​ Bir sátte ne bolyp ketti-eı?! Sonymen Báke, bala-shaǵa qutty bolsyn!​ Allah beremin dese, balasymen de sulý kelinshekti bere salady- degen osy!

(Barlyǵy kúledi)

Júzbaı aǵa:

- Baqyt inim, myna kelinshek qaısar da pysyq,​ aqyldy jar bolatyn sıaqty! Baǵyńdy baǵalaı bil! Erkeligine kóz jumyp, qyrsyqtyǵyna sabyr ete sal! Túbi seni elge qadirli etedi​ Ásemiń - dep oılaımyn!

Baqyt:

- Áýmın aǵa! Aıtqanyńyz kelsin!​ Bir sıqyrymen baýrap, ózimen birge júregimdi urlap ketken sekildi myna sulý....! Eshqashan qyzdarǵa bulaı arbalmaǵam....? Maǵan ne boldy?

Ermek:

- Jigitter úılenetin kezde osyndaı "mahabbat sındromy" -degen aýrýǵa shaldyǵady.​ Kelin qutty bolsyn Báke! Úılen! Bir jetim men jesirdi baqytty qylar múmkindigiń bar! Seni de qoldaımyn! (Barlyǵy kúledi) Qoı meni de bireý qoldy qylmaı turǵanda qaıtaıyq.?!​

(Úsheýi sahnadan ketedi)

---