Áleýmettik saýalnamaǵa sáıkes, qazaqstandyqtardyń basym bóligi «Zań jáne Tártip» qaǵıdatyn qoldap, Prezıdenttiń «Taza Qazaqstan» bastamasyn basym baǵyt dep esepteıdi. Bul týraly infohub.kz habarlaıdy.
Qazaqstandyq qoǵamdyq damý ınstıtýtynyń 2026 jyldyń II toqsanynda elimizdiń barlyq óńirlerinen 2,4 myń respondent arasynda júrgizgen zertteý nátıjesi kórsetkendeı, saýalnamaǵa qatysqandardyń 87,3% «Zań jáne Tártip» qaǵıdatynyń iske asyrylyp jatqanyn biledi. Sonymen qatar habardarlyq deńgeıi qalada da, aýyldyq jerlerde de joǵary bolyp otyr, onda turǵyndardyń 85,1% bul týraly habardar.
Jas ereksheligine qaramastan, qazaqstandyqtar zańdy saqtaýdyń mańyzdylyǵyn birdeı joǵary baǵalaıdy, bul qoǵamda ádildik, jaýapkershilik jáne quqyq ústemdigine degen suranystyń qalyptasqanyn kórsetedi.
Saýalnamaǵa qatysqandardyń kópshiligi zań men tártipti saqtaý – tek memlekettiń ǵana emes, azamattardyń da mindeti dep sanaıdy. Atap aıtqanda, 43,6% respondent jaýapkershilik memleket pen qoǵamǵa birdeı júktelgen dep eseptese, taǵy 30,6% ol eń aldymen árbir qazaqstandyqqa júktelgen dep sanaıdy. Osylaısha, saýalnamaǵa qatysqandardyń 74,2% zańdy saqtaýdy azamattardyń jeke jaýapkershiligimen tolyq nemese memleketpen birlesip baılanystyrady. Bul ustanym jastar arasynda aıqyn kórinedi: 18 ben 28 jas aralyǵyndaǵy qazaqstandyqtardyń jartysynan astamy (52,8%) zań men tártipti saqtaý úshin eń aldymen árbir azamat jaýapty dep sanaıdy.
Zertteýge qatysqandardyń 67,1% Prezıdenttiń «Taza Qazaqstan» tujyrymdamasyn basym baǵyttardyń biri dep atady. Bul bastama ártúrli jas jáne kásibı toptar – stýdentter, orta jastaǵy adamdar, jeke kásipkerler jáne joǵary bilimdi respondentter arasynda qoldaýǵa ıe. Saýalnama sondaı-aq áleýmettik ınfraqurylymnyń jaı-kúıine qanaǵattanýshylyqtyń artqanyn kórsetti. Eń joǵary baǵany mektepterdiń qoljetimdiligi (78,9%), mádenıet mekemeleri (73,8%), balabaqshalar (73,5%), sport keshenderi (72,3%) jáne demalys pen serýendeý oryndary (73,7%) aldy. Memlekettik ınstıtýttardyń jumysyn balaly otbasylar, kópbalaly otbasylar, 28 jasqa deıingi jastar jáne búdjettik sala qyzmetkerleri joǵary baǵalaıdy.
Memleket basshysy jarıalaǵan Sıfrlandyrý jáne jasandy ıntellekt jylynyń mańyzdylyǵyn respondentterdiń 66% atap ótti. Bul bastama 18–28 jas aralyǵyndaǵy jastar (65,2%) men 29–45 jas aralyǵyndaǵy azamattar (68,6%) arasynda kóbirek qoldaý tapty. Sonymen qatar saýalnamaǵa qatysqandardyń 60,7% jalpy alǵanda elimizdiń damýynyń negizgi salalaryna jasandy ıntellekt tehnologıalaryn belsendi engizýdi jaqtaıdy.
Zertteý avtorlarynyń pikirinshe, saýalnama nátıjeleri qoǵamda ómir sapasyn arttyrý, tehnologıalardy damytý, memlekettik basqarýdy jetildirý, bilim jáne ekologıalyq mádenıetke qatysty bastamalar eń kóp qoldaýǵa ıe ekenin kórsetedi.