Qazaqstan İshki ister mınıstrligi toǵyz áleýmettik jeli qoldanýshysyn quqyqqa qaıshy jáne azǵyn kontent taratqany úshin ákimshilik jaýapkershilikke tartty. Blogerler laık, donat jáne qaralym úshin qaýipti prankter uıymdastyryp, tikeleı efırde balaǵattap, adamdardy qorlaǵan, dep habarlaıdy infohub.kz.
Vedomstvo aldyn alý maqsatynda buzýshylardyń esimderi men laqap attaryn ashyq atady. Jazalanǵandar arasynda: Astana turǵyny 37 jastaǵy Indıra Eshtaeva (laqap aty «Baýyrsaq») translásıa kezinde usaq buzaqylyq jáne balaǵat sózder aıtqany úshin aıyppul salyndy. Almatydan 32 jastaǵy Aqtóre Batyrbek (laqap aty «Aqtóre») tikeleı efırde qorlap, balaǵattaǵany úshin 5 táýlikke qamaldy. Shymkentte 20 jastaǵy Danıar Seıdalıev efırde adamdy elektrshokermen urlaýdy oınatqan – sot ony 8 táýlikke qamady. Jambyl oblysynan: 41 jastaǵy Laılo Kasymova («Altyn qyz») balaǵat úshin aıyppul salynsa, 19 jastaǵy Jarqynaı Baıbek pen Asyljan Tanaberganov donat alý úshin efırde bir-birine dene jaraqatyn salǵany úshin jaýapkershilikke tartyldy.
Mınıstrliktiń resmı ókili Shyńǵys Álekeshev jelidegi anonımdilik jazadan qutylýǵa kómektespeıtinin atap ótti. «Tipti anonımdi akkaýnt nemese telefon ekranynyń artyna jasyrynýǵa bolady dep oılamańyz. İİM kez kelgen buzýshynyń jeke basyn anyqtaý úshin barlyq qajetti quraldarǵa ıe. Árbir osyndaı fakt anyqtalady. Árbir buzýshy zańǵa sáıkes jaýapkershilikke tartylady», – dedi Álekeshev.
Vedomstvo tekserýler azamattardyń kóptegen shaǵymdary boıynsha da júrgiziletinin, olar balalar men jasóspirimderge qaýipti úlgi kórsetetin destrýktıvti kontentti qabyldamaıtynyn qosty.