Qazaqstan Prezıdenti Qasym-Jomart Toqaev qyrkúıektiń ekinshi jeksenbisinde atalyp ótetin Otbasy kúnine oraı el turǵyndaryna quttyqtaý joldady, dep habarlaıdy infohub.kz saıty.
«Qurmetti otandastar! Sizderdi shyn júrekten Otbasy kúnimen quttyqtaımyn! Otbasy — memlekettiń eń mańyzdy ınstıtýty, qoǵamnyń uıytqysy degen túsinik álemde ortaq qabyldanǵan. Ulttyń biregeıligin qalyptastyratyn da — otbasy jáne onyń irgetasy. Azamattyń dúnıetanymynyń negizi, onyń moraldyq qasıetteri otbasynda qalanady. Analardyń qamqorlyǵy bizge osy álemde alǵashqy qadam jasaýǵa kómektesedi, ákelerdiń aqyly qoıǵan maqsattarǵa jetýdiń temirqazyǵy ispetti, al aǵa býynnyń danalyǵy jastardy ómirdiń qıyn jolynda qıamet-qaıymnan qorǵaıdy. Urpaqtan urpaqqa ulttyq dástúrler men joǵary adamgershilik ıdealdaryn jetkizip, halqymyzdyń mádenı kody men rýhanı tiregin nyǵaıtamyz», — dedi memleket basshysy.
Ol bıylǵy jyldyń 1 shildesinde kúshine engen Konstıtýsıaǵa sáıkes neke men otbasy, ana bolý, áke bolý jáne balalyq shaq memlekettiń qorǵaýynda ekenin qosty. Negizgi zań balalardyń quqyqtaryn, otbasyndaǵy áıelder men analardyń jaǵdaıyn aıtarlyqtaı kúsheıtedi.
«Konstıtýsıada neke — zańǵa sáıkes tirkelgen er men áıeldiń erikti jáne teń quqyly odaǵy degen ereje alǵash ret qamtyldy. Bıyl Otbasy quqyqtary jónindegi ýákil ınstıtýty quryldy. Jaýapty ata-ana bolýdy qoldaý, óskeleń urpaqtyń tolyqqandy damýyna jaǵdaı jasaý basty maqsatqa — memlekettiń básekege qabilettiliginiń sheshýshi faktory bolyp tabylatyn adam áleýetin nyǵaıtýǵa baǵyttalǵan. Eń aldymen, otbasy deńgeıinde jańa qoǵamdyq etıka tamyr jaıyp, Otanǵa degen súıispenshilik qalyptasady, zań tártibin saqtaýdyń, tabıǵatqa uqypty qaraýdyń jáne barlyq qoǵamdyq oryndardyń tazalyǵyn saqtaýdyń, balalardy halqymyzdyń úzdik dástúrlerinde tárbıeleýdiń aıryqsha mańyzdylyǵyna kóz jetkiziledi», — dedi prezıdent.
Ol osy jasampaz negizde qazaqstandyqtar jańa tarıhı kezeńde ulttyń jan-jaqty damýynda aıtarlyqtaı ilgerileýge qol jetkizetinine senim bildirdi.
«Qoıǵan maqsattarǵa jetemiz, ár otbasyna bereke men jaılylyq ornaǵan Ádiletti Qazaqstandy birge quramyz. Barlyq Qazaqstan azamattaryna zor densaýlyq pen amandyq tileımin!» — delingen tilekte.