Tamyz aıynda Qazaqstanda jaldamaly turǵyn úı baǵasy orta eseppen bir aıda 4,2%-ǵa ósti. Ásirese, Qostanaı, Petropavl jáne Túrkistan qalalarynda baǵanyń aıtarlyqtaı óskeni baıqaldy, dep habarlaıdy infohub.kz saıty.
Ulttyq statısıka búrosynyń derekterine súıensek, tamyzda respýblıka boıynsha jaldamaly turǵyn úı shildege qaraǵanda 4,2%-ǵa qymbattaǵan. Jyldyq kórsetkishte ósim 17%-dy qurady. Dástúrli túrde tamyz-qyrkúıek aılarynda jaldaý naryǵynda baǵanyń kóterilýi baıqalady, bul oqý jylynyń bastalýymen jáne stýdentterdiń iri qalalarǵa kelýimen baılanysty.
Jaldaý baǵasynyń aılyq ósimi eń joǵary Qostanaıda tirkeldi — birden 5,9%-ǵa. Petropavlda baǵa 5,5%-ǵa, al Túrkistanda 5,3%-ǵa ósti. Almatyda jaldaý aqysy 4,4%-ǵa, Astanada 4,9%-ǵa, Shymkentte 5%-ǵa qymbattady. Eń az ósim Oralda baıqaldy — nebári 0,8%.
Jyldyq esepteý boıynsha, baǵanyń ósýi boıynsha kóshbasshy Pavlodar boldy, onda jaldaý aqysy 42,5%-ǵa ósken. Ekinshi orynda Petropavl — 39,1%, úshinshi orynda Almaty — 18,1%. Astanada jyldyq ósim 17,5%-dy, Shymkentte 15,8%-dy qurady. Eń tómen jyldyq ósim Oralda — 3,8%.
Qazirgi ýaqytta eń joǵary jaldaý baǵasy Almatyda — sharshy metrine orta eseppen 6 224 teńge. Astanada — 6 079 teńge, Qaraǵandyda — 5 219 teńge. Eń arzan turǵyn úıdi Tarazda jaldaýǵa bolady — sharshy metrine 2 558 teńge.
Sarapshylar baǵanyń ósý qarqynynyń jedeldeýin oqý jylynyń bastalýymen baılanystyrady, bul kezde iri qalalarǵa myńdaǵan stýdentter keledi. Buǵan deıin jaldaý baǵasy jaz ortasynda-aq qymbattaı bastaǵany, qazir ósý qarqyny artyp kele jatqany habarlanǵan bolatyn.