Túrkistanda oblystyq balalar aýrýhanasynyń bazasynda balalarǵa arnalǵan óńirlik mamandandyrylǵan kardıohırýrgıa ortalyǵy jumysyn bastady. Munda Túrkistan jáne Qyzylorda oblystarynyń, sondaı-aq Shymkent qalasynyń jas pasıentteri joǵary tehnologıalyq medısınalyq kómek ala alady, dep habarlaıdy infohub.kz saıty.
Oblystyq densaýlyq saqtaý basqarmasy basshysynyń orynbasary Janbolat Dildábekov mundaı ortalyqtyń ashylýy týa bitken júrek aqaýy bar balalarǵa medısınalyq kómektiń qoljetimdiligin arttyrýdaǵy mańyzdy qadam ekenin atap ótti.
«Endi Túrkistan, Qyzylorda oblystary men Shymkentten týa bitken júrek aqaýy bar balalar úıine jaqyn jerde joǵary mamandandyrylǵan kardıohırýrgıalyq kómek ala alady», — dedi ol.
Jańa ortalyq quramynda kardıohırýrgıa, kardıoreanımasıa bólimsheleri jáne zamanaýı operasıalyq blok jumys isteıdi. Munda jylyna júzden astam kúrdeli operasıa jasaý josparlanýda.
Dildábekovtiń aıtýynsha, bul óńirdiń kishkentaı pasıentterine josparly da, shuǵyl da kómek kórsetýge múmkindik beredi. Ol sondaı-aq 2014 jyldan beri Túrkistan oblystyq balalar aýrýhanasynda týa bitken júrek aqaýy boıynsha 3,4 myńnan astam operasıa jasalǵanyn eske saldy. Qazirgi ýaqytta balalar kardıohırýrgıasy bólimshesinde ashyq júrekke jasalatyn kúrdeli otalardy qosa alǵanda, jylyna júzden astam operasıa jasalady.
«Jańa ortalyqtyń jumysy júrek aqaýlaryn erte anyqtaýǵa, sondaı-aq balalardy ýaqytyly emdeýge múmkindik beredi», — dep atap ótti ol.
Buǵan deıin 2025 jyly Qazaqstanda ashyq júrekke 13 myńnan astam operasıa jasalyp, júz júrek transplantasıasy oryndalǵany habarlanǵan bolatyn. Densaýlyq saqtaý mınıstrliginiń derekterine sáıkes, elde júrek-qan tamyrlary aýrýlarynan bolatyn ólim-jitim sońǵy bes jylda úshten birge tómendegen.