Túrkistan oblysynda aýyl sharýashylyǵyn qoldaýǵa arnalǵan memlekettik sýbsıdıalardy jymqyrý týraly qylmystyq is boıynsha tergeý aıaqtaldy. Búdjetke keltirilgen shyǵynnyń jalpy somasy 103 mln teńgeni qurady, dep habarlaıdy infohub.kz saıty.
Qarjylyq monıtorıń agenttiginiń resmı Telegram-arnasynda málim bolǵandaı, tergeýdi Agenttiktiń Túrkistan oblysy boıynsha departamenti boljamdy qylmystyq topqa qatysty júrgizdi.
Tergeý nusqasy boıynsha, zańsyz sqemany júzege asyrý úshin tórt jeke kásipker, sondaı-aq úshinshi tulǵalarǵa formaldy túrde tirkelgen «Nur-Keles» JSHS jáne «Bımen S.» JSHS paıdalanylǵan. Olardy naqty basqarý elektrondyq sıfrlyq qoltańbalar, mórler jáne bank shottaryn basqarýǵa notarıaldy senimhattar arqyly júzege asyrylǵan.
Vedomstvonyń dereginshe, atalǵan sýbektilerdi paıdalanyp, aqparattyq júıelerge aýyl sharýashylyǵy janýarlaryn satyp alý jáne olardyń bolýy, sondaı-aq seleksıalyq jumystardyń júrgizilýi týraly kórineý jalǵan málimetter engizilgen. Sodan keıin sýbsıdıa alýǵa elektrondyq ótinimder rásimdelgen.
Búdjetten alynǵan qarajat qolma-qol aqshaǵa aınaldyrylyp, sqemaǵa qatysýshylar arasynda bólinip, jeke maqsattarǵa jumsalǵan. Keltirilgen shyǵynnyń jalpy somasy 103 mln teńge boldy.
«Nátıjesinde adal aýyl sharýashylyǵy taýar óndirýshilerin qoldaýǵa jáne óńirdegi mal sharýashylyǵyn damytýǵa arnalǵan búdjet qarajaty maqsatsyz paıdalanyldy», — dep atap ótti QMA-da.
Sottyń sanksıasymen kúdiktilerdiń múlkine tyıym salyndy: eki turǵyn úı, tórt avtokólik, turaq orny jáne jer ýchaskesi.
Kúdiktilerdiń biri qamaýǵa alyndy, ekinshisine qatysty kepil túrindegi bultartpaý sharasy tańdaldy.
Qylmystyq is júrgizý kodeksiniń 201-babyna sáıkes ózge aqparat jarıalaýǵa jatpaıdy.