Qazaqstanda áıelimen tatýlasqannan keıin ony qaıta urǵan er adam qylmystyq jaýapkershilikke tartylýy múmkin. Ekinshi ret te jazadan qutylǵanyna qaramastan, prokýratýra sot sheshimine narazylyq bildirdi, dep habarlaıdy infohub.kz saıty.
Bas prokýratýra turmystyq zorlyq-zombylyq isi boıynsha sot sheshimine narazylyq bildirdi. Er adam áıeliniń densaýlyǵyna jeńil zıan keltirgen, sodan keıin taraptar tatýlasyp, ol qylmystyq jaýapkershilikten bosatylǵan. Alaıda kóp uzamaı ol áıeline qaıta qol kótergen. Ekinshi ret te is taraptardyń tatýlasýyna baılanysty toqtatylǵan.
«Prokýratýra buǵan kelispedi. Kasasıalyq narazylyq boıynsha sot aktisi joıylyp, is ony qylmystyq jaýapkershilikke tartý úshin jańadan qaraýǵa jiberildi», — delingen habarlamada.
Bas prokýratýra mundaı jaǵdaıdyń jalǵyz emes ekenin atap ótti. «Bas prokýratýra taǵy úsh sot aktisine narazylyq bildirdi, onda tatýlasýǵa baılanysty buryn qylmystyq jaýapkershilikten bosatylǵan adamdar dál sol negizde qaıtadan jazadan qutylǵan», — dep qosty qadaǵalaý organy.
Prokýratýra 2024 jyldan bastap qoldanystaǵy zańnamadaǵy ózgeristerge erekshe nazar aýdardy. «2024 jyldan bastap Qazaqstanda turmystyq zorlyq-zombylyq úshin jaýapkershilik aıtarlyqtaı kúsheıtildi. Uryp-soǵý jáne densaýlyqqa qasaqana jeńil zıan keltirý ákimshilik saladan qylmystyq salaǵa aýystyryldy», — dep túsindirdi Bas prokýratýrada.
Endi dál osyndaı negizde qaıtadan bosatýǵa jol berilmeıdi. «Endi zań dál osylaı qaıtadan jaýapkershilikten qutylýǵa múmkindik bermeıdi. Zań qorǵaýdy qajet etetinderdi qorǵaýy tıis. Al prokýratýra onyń qatań oryndalýyn talap etedi», — dep atap ótti Bas prokýratýrada.